စစ်ကိုင်းတိုင်း၊ ဝက်လက်မြို့နယ်၊ ရွှေပန်းကုံးရွာအနီးတွင် အကြမ်းဖက်စစ်ကောင်စီတပ်နှင့် ဒေသတွင်း ပြည်သူ့ကာကွယ်ရေးအဖွဲ့တို့ တိုက်ပွဲဖြစ်ပွားနေပြီး စစ်ကောင်စီဘက်မှလက်နက်ကြီးများဖြင့် ပစ်ခတ်နေကြောင်းဒေသခံများက ပြောသည်။
ယနေ့(နိုဝင်ဘာလ ၁၉ ရက်)နံနက် ၉ နာရီဝန်းကျင်ခန့်တွင် ဝက်လက်-အရာတော်လမ်းပေါ်ရှိ ၀က်လက်မြို့နယ် သမ္မရိုးကျေးရွာသို့ စစ်ကောင်စီတပ်များရောက်ရှိလာပြီးနောက် ပြည်သူအချို့အား ဖမ်းဆီးခဲ့ကြောင်း၊ ထို့နောက် သမ္မရိုးရွာမှ တည်တောလမ်းဘက်ထွက်သွားခဲ့ပြီးရွှေပန်းကုံးရွာအနောက်ဘက်တွင် ဒေသခံပြည်သူ့ကာကွယ်ရေးတပ်ဖွဲ့များနှင့် အပြန်အလှန်ပစ်ခတ်တိုက်ပွဲဖြစ်နေကြခြင်းဖြစ်ကြောင်း ဒေသခံများက ပြောသည်။
“ဖမ်းဆီးခံရတဲ့ပြည်သူတွေကို လူသားဒိုင်းသဘောနဲ့လုပ်နေတယ်။ အဖမ်းခံရတာ နှစ်ဆယ်လောက်ရှိတယ်ပြောတယ်။”ဟု ဒေသခံတစ်ဦးက ပြောသည်။ အကြမ်းဖက်စစ်ကောင်စီတပ်နှင့်အတူ ပျူစောထီးများလည်းပါဝင်ကြောင်း ဒေသခံများက ပြောသည်။
ပစ်ခတ်မှုဖြစ်ပွားရာနေရာများသည် အရာတော်နယ်နှင့်ထိစပ်နေသည်။ယမန်နေ့ညနေ ၅ နာရီဝန်းကျင်က အရာတော်အရှေ့နယ်မှ ဒုံဒစ်ကျေးရွာနှင့် ပေါက်ပင်ဆိပ်ကျေးရွာကို ဝင်ရောက်မွှေနှောက်ပြီး ပြန်လာသော အကြမ်းဖက်စစ်ကောင်စီတပ်နှင့် ဒေသခံပျူစောထီး(ပြည်သူ့စစ်)များ၏ ခြေလျင်စစ်ကြောင်းကို အရာတော်မြို့နယ် တော်လှန်ရေးအင်အားစု (ARA)က တပ်ဖွဲ့ ၃ ဖွဲ့ပေါင်းပြီး မိုင်းဆွဲတိုက်ခိုက်ခဲ့ရာ စစ်ကောင်စီတပ်သား(၁၀)ဦးခန့် ဒဏ်ရာပြင်းထန်နိုင်ကြောင်းARAက သတင်းထုတ်ပြန်ထားသည်။
Public Service Announcement
