အကြမ်းဖက်စစ်ကောင်စီမှစစ်ကိုင်းတိုင်းဝန်ကြီးချုပ်မြတ်ကျော်၏ယာဉ်တန်းကို ကလေးဝ-တန့်ဆည်-ရေဦးလမ်းတွင် ကလေးဝ PDF က မိုင်းခွဲတိုက်ခိုက်ခဲ့သည်။
ကလေးဝ-တန့်ဆည်-ရေဦးလမ်းမှကလေးဝမြို့နှင့် ခြောက်မိုင်ခန့်ဝေးသော ယုဇနကျေးရွာအနီးတွင် ယနေ့(နိုဝင်ဘာ၁စရက်) နံနက် ၁၀နာရီ ၃၇မိနစ်က မိုင်းခွဲတိုက်ခိုက်ခဲ့ခြင်းဖြစ်ကြောင်း ကလေးဝ PDF တပ်ဖွဲ့ဝင်တစ်ဦးက ပြောသည်။
“စစ်ကား ၆စီးရံပြီး မောင်းလာတာ။ ကျတော်တို့ ပဒေသာမိုင်းဆင်ပြီး ဆွဲတာ။ မိုင်းကွဲပေမယ့် အားလုံးတော့ မကွဲဘူး”ဟု ၎င်းက ပြောသည်။
“ကွဲကွဲချင်း စက်သေနတ်နဲ့ ပြန်ပစ်တယ်။ လက်နက်ကြီးနဲ့ ပြန်ထုလို့ ဆုတ်ခဲ့လိုက်တယ်။ ထိခိုက်မှုတော့ မသိသေးဘူး”ဟု ၎င်းက ဆက်ပြောသည်။
ကလေးဝတွင် ယခုကဲ့သို့ မိုင်းခွဲတိုက်ခိုက်နေချိန် ယောဒေသ ဆောမြို့တွင်လည်း တိုက်ပွဲပြင်းထန်နေသည်။
ဆောနယ်မှာ စစ်ကောင်စီတပ်က Mi35ရဟတ်ယာဉ်ဖြင့် ဗုံးကြဲတိုက်ခိုက်နေပြီး စက်သေနတ်များဖြင့်လည်း ပစ်ခတ်နေသည်ဟု ယနေ့( နိုဝင်ဘာ ၁၉ရက်) နေ့လယ် ၁နာရီခန့်အခြေအနေကို ဒေသခံတစ်ဦးက ပြောသည်။
ဒေသခံကာကွယ်ရေး တပ်ဖွဲ့များနှင့်CDF မင်းတပ်၊ ကန်ပက်လက် ပူးပေါင်း တပ်ဖွဲ့များက စစ်ကူအဖြစ် သွားရောက်တိုက်ခိုက်နေပြီး လက်ရှိတွင် တိုက်ပွဲပြင်းထန်နေသည်ဟု PDFနှင့် နီးစပ်သူတစ်ဦးကပြောသည်။