နေပြည်တော်က နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်နေအိမ်မှာ ဦးဖြိုးမင်းသိန်းက ရွှေချောင်းတွေနဲ့ ဒေါ်လာတွေ ပေးခဲ့တယ်ဆိုတဲ့အမှု အတွက် ဒေါ်အောင်ဆန်းစုကြည်ရဲ့ အိမ်အကူ ဒေါ်ဝေဝေသန်းကို စစ်ကောင်စီဘက်က တရားလိုပြသက်သေအဖြစ်တင်သွင်းထားပါတယ်။
ဒီအမှုဟာ ဦးဖြိုးမင်းသိန်းက လာဘ်ပေးတယ်ဆိုတဲ့ စွပ်စွဲချက်ကြောင့် စစ်ကောင်စီ က ဒေါ်အောင်ဆန်းစုကြည်ကို အဂတိပုဒ်မနဲ့တရားစွဲထားတဲ့အမှုဖြစ်ပါတယ်။
အဲဒီအမှုမှာ နေပြည်တော်က ဒေါ်အောင်ဆန်းစုကြည်နေအိမ်မှာကာလရှည်စွာ နေထိုင်တဲ့အိမ်အကူ ဒေါ်ဝေဝေသန်းကို စစ်ကောင်စီက တရားလိုပြသက်သေအဖြစ်တင်သွင်းထားပြီး တရားရုံးကသက်သေအဖြစ် ဆင့်ခေါ်ထားတယ်လို့သိရပါတယ်။
ခင်မင်ရင်းနှီးသူတွေက မဝေလို့ ခေါ် တဲ့ ဒေါ်ဝေဝေသန်းဟာ ၂၀၁၅ မတိုင်ခင်ကတည်းက နေပြည်တော် မှာ ဒေါ်အောင်ဆန်းစုကြည်ရဲ့ အိမ်အကူအဖြစ် လုပ်ကိုင်ပေးသူဖြစ်ပါတယ်။
သူရဲ့အမျိုးသား ကိုပုဟာ ဒေါ်အောင်ဆန်းစုကြည်ရဲ့ အနီးအပါးမှာ ကွယ်လွန်ချိန်ထိ နှစ်ပေါင်းများစွာ သစ္စာရှိစွာ တာဝန်ထမ်းဆောင်ခဲ့သူတစ်ဦးဖြစ်ပြီး ၂၀၁၈ ခုနှစ်အတွင်းက နေပြည်တော်မှာ ကွယ်လွန်ခဲ့ပါတယ်။
ကိုပုရဲ့ ဈာပန ကို ဒေါ်အောင်ဆန်းစုကြည်ကိုယ်တိုင်တက်ရောက်ခဲ့တာတွေ့ရပါတယ်။
ကိုပုနဲ့ မဝေတို့ ရဲ့ သားဖြစ်သူ မွေးဖွားတဲ့အခါမှာလည်း နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည် ဟာ ဆေးရုံကိုသွားရောက်ကြည့်ရှုခဲ့သလို ကလေးရဲ့မွေးနေ့တွေကိုလည်း နှစ်စဉ် ပြုလုပ်ပေးခဲ့တာရှိခဲ့ပါတယ်။