ကိုဗစ်စည်းကမ်းချိုးဖောက်တယ်ဆိုပြီး သဘာဝဘေးအန္တရာယ်စီမံခန့်ခွဲမှု ဥပဒေပုဒ်မ ၂၅ နဲ့ သမ္မတ နဲ့ နိုင်ငံတော်အတိုင်ပင်ခံပုဂ္ဂိုလ် တို့ကို စွဲဆိုထားတဲ့အမှုကို တရားရုံးက လာမယ့် ဒီဇင်ဘာလ ၆ ရက်မှာအမိန့်ချမယ်လို့ သိရပါတယ်။
ဒီအမှုဟာ သမ္မတ နဲ့ ဒေါ်အောင်ဆန်းစုကြည် တို့ ရွေးကောက်ပွဲမဲဆွယ်ကာလ NLD မဲဆွယ်ယာဉ်တန်းကို ထွက်နှုတ်ဆက်ရာမှာ ကိုဗစ်စည်းကမ်းဖောက်ဖျက်တယ်ဆိုပြီး အာဏာသိမ်းပြီးနောက် စစ်တပ်က ကနဦး ဆွဲဆိုတဲ့အမှုတွေဖြစ်ပါတယ်။
ဒီနေ့တရားခွင်မှာ ဒီအမှုအတွက် နှစ်ဖက် လျှောက်လဲချက်အပြီးသတ်ပေးခဲ့ကြတယ်လို့သိရပါတယ်။
အဲဒီနောက် တရားသူကြီးက စီရင်ချက် ချမယ့်နေ့ကို ဒီဇင်ဘာလ ၆ ရက်သတ်မှတ်လိုက်တာပါ။
Public Service Announcement
ဒီနေ့ တရားခွင် မှာ သဘာဝဘေးအန္တရာယ်ဆိုင်ရာစီမံခန့်ခွဲမှု ဥပဒေပုဒ်မ ၂၅ နဲ့စွဲဆိုထားတဲ့အမှုအပြင် ဒေါ်အောင်ဆန်းစုကြည်ကို ဆက်သွယ်ရေးဥပဒေ ၊ ပို့ကုန်သွင်းကုန်ဥပဒေတွေနဲ့ ဆွဲဆိုထားတဲ့အမှုကိုလည်းစစ်ဆေးခဲ့တယ်လို့သိရပါတယ်။
အဲဒီအမှု ၂ ခုလုံးအတွက် ဒေါ်အောင်ဆန်းစုကြည်ဟာ သက်သေအဖြစ် ထွက်ဆိုခဲ့ပါတယ်။
စကားပြောစက်တွေ တွေ့လို့ စစ်ကောင်စီက တရားစွဲတဲ့ အဲဒီအမှု ၂ ခု လုံးအတွက် ၂ ဖက် အပြီးသတ် လျှောက်လဲချက်ပေးမယ့်ရက်ကို လာမယ့် ဒီဇင်ဘာလ ၆ ရက်ကို ပဲတရားရုံးက ချိန်းဆိုထားပါတယ်။
ဒီနေ့တရားခွင်မစတင်မီ ရှေ့နေအဖွဲ့ဟာ သမ္မတနဲ့ ဒေါ်အောင်ဆန်းစုကြည်တို့နဲ့တွေ့ဆုံခဲ့ကြပြီး ၂ ဦးလုံးကျန်းမာရေးကောင်းမွန်ကြတယ်လို့သိရပါတယ်။
ဆူပူအောင်လှုံဆော်မှုနဲ့ စစ်ကောင်စီက သမ္မတ ၊ ဒေါ်အောင်ဆန်းစုကြည် ၊ ဒေါက်တာမျိုးအောင်တို့ကို ရာဇသတ်ကြီး ပုဒ်မ ၅၀၅ (ခ) နဲ့စွဲဆိုထားတဲ့အမှုကို ဒီလကုန်မှာ အမိန့်ချ ဖို့ လည်းရှိနေပါတယ်။
