ရှမ်းပြည်နယ်မြောက်ပိုင်း၊ မူဆယ်မြို့နယ်တွင်စစ်ကြောင်းထိုးနေသည့် အကြမ်းဖက်စစ်ကောင်စီတပ်က အကြားအာရုံ ချို့ယွင်းနေသည့် အရပ်သားတစ်ဦးကို သေနတ်ဖြင့် ပစ်သတ်ခဲ့ကြောင်း ဒေသခံများကပြောသည်။
မူဆယ်မြို့နယ် မော်တောင်းရွာမှ အသက် ၅၆ နှစ်အရွယ်ဦးလဖိုင်တိန်ကို အကြမ်းဖက်စစ်ကောင်စီတပ်က အကြောင်းမဲ့ သတ်ဖြတ်သွားခြင်းဟု ဒေသခံများကပြောသည်။
“ဦးလဖိုင်ထိန်က နားမကြားရှာဘူး။ တိုက်ပွဲ ဖြစ်နေရင်တောင် သူမသိဘူး။ သူယာခင်းမှာ အလုပ်လုပ်နေတာကို သတ်သွားတာ” ဟု ဒေသခံတစ်ဦးကပြောသည်။
အကြမ်းဖက်စစ်ကောင်စီသည် နိုဝင်ဘာ ၂၄ ရက်က တအာင်းတိုင်းရင်းသားလက်နက်ကိုင်အဖွဲ့(TNLA)နှင့် တိုက်ပွဲဖြစ်ပြီး အပြန်တွင် လမ်းခုလတ်တစ်နေရာ၌ ဦးလဖိုင်ထိန်အား သတ်ဖြတ်သွားခြင်းဟု ဆိုသည်။
Public Service Announcement
“ရွာပြန်လာမယ်ဆိုပြီးမိသားစုဆီ ဖုန်းဆက်သေးတယ်။ နောက်တော့ အဆက်အသွယ်မရလို့ လိုက်ရှာတာမှာ အလောင်းကို ပြောင်းခင်းထဲမှာ မြေမြုပ်ထားတာတွေ့တာ။အကြားအာရုံမကောင်းတော့ သေနတ်သံတွေမကြားဘဲ တောင်ယာက အိမ်ကိုပြန် ဆင်းလာတာကနေ စစ်တပ်နဲ့တွေ့ပြီး အသတ်ခံရတာ” ဟု မော်တောင်းဒေသခံတစ်ဦးကပြောသည်။
ဦးလဖိုင်ထိန်ကသည် မသေဆုံးခင် ရိုက်နှက်နှိပ်စက်ခံထားရပြီး ဖူးယောင်ဒဏ်ရာများ ရရှိထားသည်ဟု ဒေသခံများကပြောသည်။မိသားစုကဦးလဖိုင်ထိန်၏ ရုပ်အလောင်းကို ရွာသို့ ပြန်သယ်ကာ နာရေးပြုလုပ်ခဲ့ရသည်။
