စစ်ကိုင်းတိုင်း မြောင်မြို့နယ် နဘတ်ကျေးရွာနှင့် ဆွဲလဲအိုကျေးရွာကြား ခြေလျင်ဖြန့်တက်လာသည့် စစ်ကောင် စီတပ်ဖွဲ့ကို မိုင်းဆွဲတိုက်ခိုက်ရာ ခုနှစ်ဦးသေဆုံးပြီး ခုနှစ်ဦးခန့်ဒဏ်ရာရရှိနိုင်သည်ဟု မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ့-CDSOM က ယနေ့ (နိုဝင်ဘာ ၂၆ ရက်) ထုတ်ပြန်သည်။
တိုက်ပွဲ ဖြစ်စဥ်မှာ နိုဝင်ဘာ၂၅ ရက် နေ့လည် ၃နာရီခန့်က နဘတ်ကျေးရွာနှင့် ဆွဲလဲအိုကျေးရွာကြား ခြေလျင်ဖြန့်တက်လာသည့် စစ်ကောင်စီတပ်ဖွဲ့ကို ကနဦးတိုက်ခိုက်ရာ ခြောက်ဦးသေဆုံးပြီး သုံးဦးဒဏ်ရာရခဲ့ကြောင်း CDSOMက ဆိုသည်။
ထို့နောက် မိုင်းဆွဲတိုက်ခိုက်ခံရသည့် စစ်တပ်ကို တပ်ကူပေးရန် လာရောက်သော စစ်ကောင်စီကားနှစ်စီးကို ညနေ ၅ နာရီ ခွဲခန့်တွင် ထပ်မံမိုင်းခွဲတိုက်ခိုက်ရာ တစ်ဦးသေဆုံးပြီး လေးဦးခန့် ဒဏ်ရာရရှိသည်ဟု ထုတ်ပြန်ချက်တွင် ဖော်ပြထားသည်။
တိုက်ခိုက်မှုဖြစ်စဥ် နှစ်ခု အနက် ပထမအကြိမ်တိုက်ခိုက်မှုမှာ ပြည်သူ့တပ်မတော် (မြောင်)- MUA အဖွဲ့ဦးဆောင်ပြီး နှလုံးလှလူမိုက်ကြီးများအဖွဲ့၏ မိုင်းဖြင့် မြောင်မြို့နယ်ပြည်သူ့ကာ ကွယ်ရေးနှင့်လုံခြုံရေးအဖွဲ့- CDSOM၊ အမျိုး သမီးပြောက်ကျားစစ်သည်တော်များအဖွဲ့ (မြောင်)-M2W နှင့် Myaung Special People’s Defense Force- MSPDF မှ ပူးပေါင်း ခဲ့သည်။
Public Service Announcement
ဒုတိယအကြိမ် တိုက်ခိုက်မှုကို မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ့- CDSOM နှင့် Zamani Revolution Force- MMU Myaung တို့ မဟာမိတ်စစ်ဆင်ရေးအဖြစ် ပူးပေါင်းတိုက်ခိုက်ခြင်းဖြစ်ပြီး ပြည်သူ့ရဲဘော် တဦးတယောက်မျှ ကျဆုံးခြင်း၊ ဒဏ်ရာရရှိခြင်းမရှိကြောင်း သိရသည်။
