ကလေးမြို့နယ်တွင် ယမန်နေ့(ဒီဇင်ဘာ၃ရက်)က မိုင်းဆွဲတိုက်ခိုက်ခံရသော အကြမ်းဖက်စစ်ကောင်စီတပ်မှ ဒဏ်ရာရသူများအနက် ခုနှစ်ဦးထပ်မံသေဆုံး၍ စုစုပေါင်းသေဆုံးသူ ၁၀ဦးအထိရှိလာပြီး ၎င်းတို့ကို ခုံတိုးမြို့သာ ရွာသုဿာန်တွင် မီးရှို့သဂြိုလ်ကြောင်း Ranger Kalay Defend Force(RKDF)က ထုတ်ပြန်သည်။
ဒီဇင်ဘာ၃ရက် နံနက်၈နာရီခွဲခန့်တွင် လယ်ခြားနှင့်ရှားတောကျေးရွာများအား မီးရှို့ပြန်လာသည့် အကြမ်းဖက်စစ်ကောင်စီတပ်ကို ဒေသခံကာကွယ်ရေးတပ်ဖွဲ့တစ်ခုဖြစ်သည့် RKDFက မိုင်းဆွဲတိုက်ခိုက်ခဲ့ခြင်းဖြစ်သည်။
တိုက်ပွဲ ဖြစ်စဥ်တွင် စစ်ကောင်စီတပ်သား သုံးဦး သေဆုံးသည်ကိုသာ RKDFက ကနဦး ထုတ်ပြန်ခဲ့သည်။
ထို့နောက် ဒီဇင်ဘာ ၃ ရက်ည ၁၀ နာရီတွင် နောက်ဆုံးရရှိသော အတွင်းသတင်းအရ နံနက်ပိုင်းက ဒဏ်ရာအပြင်း အထန်ရသွားသော တပ်သားများသည် ဆေးကုသမှု့ခံယူရင်း သေဆုံးသွားသည်မှာ ခုနစ်ဦးအထိရှိကြောင်း ထုတ်ပြန်ချက်တွင် ပါရှိသည်။
သေဆုံးသွားသော စစ်ကောင်စီတပ်သား စုစု ပေါင်း ၁၀ ဦးကို မြောက်စည်းရဲစခန်းမှ သုံးဘီးဆိုင်ကယ်ဖြင့်သယ်၍ ခုံတိုးမြို့သာ ရွာသုဿာန်တွင် မီးရှို့သဂြိုလ် သွားသည်ဟု မျက်မြင်တွေ့ ရှိခဲ့သော ဒေသခံများထံမှတစ်ဆင့်ကိုးကား၍ RKDFအတည်ပြုသည်။
အကြမ်းဖက်စစ်ကောင်စီတပ်မှ ကျန်ရှိဒဏ်ရာ ရသူစာရင်းမှာ ၂၃ ဦးဟု အတိအကျသိရှိရပြီး ထိုဒဏ်ရာရရှိထားသူများများအနက် စိုးရိမ်ရသောအခြေအနေအထိ ရောက်ရှိနေသော စစ်ကောင်စီတပ်သားများပါဝင်ကြောင်းလည်း RKDFက ဆိုသည်။