ကရင်ပြည်နယ် ဘားအံမြို့မှာ စစ်ကောင်စီက လိုင်စင်မဲ့ယာဉ်တွေကို လိုက်လံဖမ်းဆီးတာနဲ့ စစ်ဆေးရေးဂိတ်တွေမှာ စစ်ဆေးမှုတွေ ပိုမိုတင်းကြပ်နေတယ်လို့ မြို့ခံတွေက ပြောပါတယ်။
ပြီးခဲ့တဲ့ နိုဝင်ဘာလကုန်ပိုင်းကစပြီး ဘားအံမြို့မှာ လိုင်စင်မဲ့ယာဉ်တွေကို စစ်ကောင်စီက လိုက်လံဖမ်းဆီးသိမ်းဆည်းနေပြီး အခုနောက်ပိုင်း စစ်ဆေးရေးဂိတ်နဲ့ တံတားလုံခြုံရေးဂိတ်တွေမှာ စစ်ဆေးမှုတွေ ပိုမိုတင်းကြပ်လာနေတာ ဖြစ်ပါတယ်။
ဒီလို စစ်ကောင်စီက မြို့အဝင်အထွက်နေရာနဲ့ မြို့တွင်းထဲမှာ ဖမ်းဆီးစစ်ဆေးတာတွေကြောင့် ဒေသခံရွာသားတွေအများစုက မြို့ထဲကို မလာရဲကြတော့ဘဲ ကုန်ပစ္စည်းရောင်းဝယ်မှုတွေမှာလည်း အသုံးစရိတ်တွေ ပိုမိုများလာခဲ့တယ်လို့ ဘားအံမြို့ခံတစ်ဦးက ပြောပါတယ်။
ဘားအံမြို့အဝင်အထွက်နဲ့ တံတားစစ်ဆေးရေးဂိတ်နေရာတွေမှာ စစ်ကောင်စီက လိုင်စင်မဲ့ယာဉ်တွေကို လိုက်လံဖမ်းဆီးနေတာကြောင့် လိုင်စင်မဲ့ယာဉ်ကိုအသုံးပြုပြီး သွားလာလုပ်ကိုင်နေရတဲ့ ဒေသခံရွာသားတွေအတွက် အခက်ပိုကြုံနေရတာပါ။
ဒေသခံတွေဟာ မြို့တွင်းထဲကို ကုန်ပစ္စည်းတွေသွားရောက်ပို့ဆောင်ပါက လိုင်စင်ရှိတဲ့ယာဉ်ကို အသုံးပြုငှားရမ်းနေရတာကြောင့် ကုန်ကျစရိတ်တွေ ပိုမိုများပြားလာခဲ့ပြီး အရှုံးနဲ့ရင်ဆိုင်နေရတယ်လို့ သိရပါတယ်။
ဒါ့အပြင် ဘားအံသံလွင်တံတားဂိတ်မှာလည်း သွားလာနေတဲ့ ခရီးသွားပြည်သူတွေအပေါ် စစ်ဆေးမှုတွေ ပိုမိုတင်းကြပ်လာခဲ့ပြီး အထူးသဖြင့် ခရီးသည်တင်ကားတွေကို အဓိကထားစစ်ဆေးခဲ့ကာ ဖုန်းတွေပါစစ်ဆေးမှုတွေ လုပ်ဆောင်ခဲ့တာပါ။
ပြီးခဲ့တဲ့ ရက်ပိုင်းက မြဝတီကနေ ဆင်းလာတဲ့ ခရီးသည်တင်ကားတွေကို တားဆီးစစ်ဆေးရာမှာ လက်နက်နဲ့ လူအချို့ကို ဖမ်းဆီးရမိတာတွေရှိနေတယ်လို့ သိရပါတယ်။