ဆားလင်းကြီးနယ်ခံ ၁၀ဦးကို စစ်ကောင်စီတပ်က မီးရှို့သတ်ဖြတ်

စစ်ကိုင်းတိုင်း ဆားလင်းကြီးမြို့နယ် ဒေသခံ ၁၀ဦးကို အကြမ်းဖက်စစ်ကောင်စီတပ်က မီးရှို့သတ်ဖြတ်သွားကြောင်း PVTV သတင်းတွင် ယ​နေ့( ဒီဇင်ဘာ ၇ရက်) ဓာတ်ပုံနှင့်တကွ ဖော်ပြထားသည်။

စစ်ကောင်စီတပ်သည် ယနေ့တွင် ဆားလင်းကြီးမြို့နယ် ဒုန်းတောရွာသို့ ဝင်ရောက်ပြီး ကိုင်းတောထဲ တွေ့သည့် ပြည်သူများကို ဖမ်းဆီး ကြိုးတုပ် မီးရှို့သွားခဲ့ကြောင်း ဒေသခံများ၏ ပြောကြားချက်ကို ကိုးကားဖော်ပြထားခြင်းဖြစ်သည်။

“အသတ်ခံရသူ ရွာသူရွာသား ၁၀ဦးဖြစ်ပြီး စာရင်းအတိ အကျကိုတော့ သိရှိရခြင်း မရှိသေးပါဘူး။ အကြမ်းဖက်စစ်ကောင်စီတပ်တွေက ကျေးစာကျရွာကို စစ်ကြောင်းထိုးပြီး ပြည်သူတစ်ယောက်ကို သတ်သွားပြီးအပြန်မှာ မိုင်းဆွဲခံရတဲ့အတွက် ဒုန်းတောရွာကို ဝင်ပြီး အခုလို အရပ်သားပြည်သူတွေကို မီးရှို့သတ်ဖြတ်သွားခြင်း ဖြစ်တယ်လို့ သိရပါတယ်”ဟု PVTV သတင်းတွင် ဖော်ပြထားသည်။

ကျေးစာကျ၊ ရွာသာ၊ ဂုဏ်တော၊ဒုံးတောနှင့် ကံကုန်းကျေးရွာများ၌ စစ်ဘေးရှောင်ပြည်သူ ၅၀၀ကျော်ရှိပြီဟု ဆိုသည်။

Public Service Announcement

ဒုန်းတောရွာဖြစ်စဉ် အသေးစိတ်အခြေအနေနှင့်ပတ်သက်ပြီး မေးမြန်းရန် ဒေသခံအချို့ထံ ဆက်သွယ်ခဲ့ရာ အဆက်အသွယ်မရသေး၍ ဆက်လက်စုံစမ်းနေဆဲဖြစ်သည်။

စစ်ကောင်စီတပ်အနေဖြင့် စစ်ကိုင်းတိုင်းရှိ မြို့နယ်များ၌ ကျေးလက်ဒေသများသို့ ဝင်ရောက်စီးနင်းမှုများ၊ အရပ်သားများကို ဖမ်းဆီးသတ်ဖြတ်ခြင်းများ ယခင်ကတည်းက လုပ်ဆောင်နေခြင်းဖြစ်သည်။