အာဏာသိမ်းစစ်ကောင်စီတပ်ကို ခုခံတိုက်ခိုက်ရင်း ကျဆုံးခဲ့သည့် ကရင်နီတပ်မတော်(KA)၏ အရာရှိငယ် တစ်ဦး၏ ဈာပနကို ယနေ့(ဒီဇင်ဘာ ၁၈ရက်)တွင် ပြုလုပ်ခဲ့သည်။
ဒီဇင်ဘာ ၁၆ရက်က လွိုင်ကော်မြို့နယ် လွိုင်လင်လေးဒေသ သို့စစ်ကြောင်းထိုးလာသည့် အကြမ်းဖက်စစ်ကောင်စီတပ်ကို KAနှင့် ကရင်အမျိုးသားကာကွယ်ရေးတပ်ဖွဲ့(KNDF) တို့ ခုခံတိုက်ခိုက်ခဲ့ရာ KA မှ ဗိုလ်မိုးစက် ဆိုသည့် အရာရှိတစ်ဦး ကျဆုံးခဲ့သည်။ အဆိုပါတိုက်ပွဲ၌ စစ်ကောင်စီတပ်မှလည်း သုံးဦးသေဆုံးကာ လေးဦးဒဏ်ရာရခဲ့သည်။
တိုက်ပွဲ၌ ကျဆုံးခဲ့သည့် KAအရာရှိ၏ ဈာပနအခမ်း အနားကို ယနေ့ ပြုလုပ်ခဲ့ရာ တပ်ဖွဲ့ဝင်အများအပြား လိုက်ပါပို့ဆောင်ကြသည်ကို တွေ့ရသည်။
“ဗိုလ်လေး တာဝန်ကျေခဲ့ပြီကျွန်တော်တို့ ဗိုလ်လေးလိုချင်တဲ့ ဖက်ဒရယ်ဒီမိုကရေစီ ပြည်ထောင်စုကို တည်ထောင်နိုင်တဲ့အထိ ဆက်လက်တိုက်ပွဲဝင်သွားဖို့ ကတိပြုပါသည်။ ဗိုလ်လေးကောင်းရာ သုဂတိလားပါစေ”ဟု KNDF လွိုင်ကော်ဇုန်က ဗိုလ်မိုးစက် ကျဆုံးမှုနှင့်ပတ်သက်ပြီး ထုတ်ပြန်သည်။
Public Service Announcement
