ဂန့်ဂေါမြို့နယ်အတွင်း စစ်ကောင်စီတပ်၏ အကြမ်းဖက်စီးနင်းမှုများနှင့် ရပ်ရွာလူနေအိမ်များကို မီးရှို့ဖျက်ဆီးနေမှုများကြောင့် ကျေးရွာနေပြည်သူ ၈ဝဝဝ နှင့်အထက်မှာ ဘေးလွတ်ရာနေရာများသို့ ထွက်ပြေးတိမ်းရှောင်နေကြရကြောင်း ဂန့်ဂေါပြည်သူ့ကာကွယ်ရေးတပ်ဖွဲ့(PDF)က ထုတ်ပြန်သည်။
ထိုသို့ထွက်ပြေးတိမ်းရှောင်နေကြရသူများသည် နေရာထိုင်ခင်း၊ အစားအသောက်၊ ဆေးဝါးနှင့် ရာသီဥတု စသောအခက်အခဲများ ရင်ဆိုင်ကြုံတွေ့ခံစားနေကြရသည်ဟု ဆိုသည်။
သွားလာရေးခက်ခဲမှု၊ ကုန်စည်စီးဆင်းမှုမရှိခြင်း၊ အင်တာနက်လိုင်းပြတ်တောက်မှုနှင့် Media attention အားနည်းမှုများကြောင့် စစ်ဘေးရှောင်ပြည်သူများအား ထောက်ပံ့ကူညီပေးနိုင်ရေးသည် လွန်စွာမှ ခက်ခဲကြောင်း၊ ဂန့်ဂေါ PDF အနေဖြင့် လက်နက်ကိုင် တိုက်ပွဲဝင်ခြင်းအပြင် စစ်ဘေးရှောင်များအား ကူညီထောက်ပံ့ပေးရေး တာဝန်များကိုပါ ပူးတွဲထမ်းဆောင်လျက် ရှိကြောင်း ဖော်ပြထားသည်။
ပြည်တွင်း၊ပြည်ပ အလှူရှင်များအနေဖြင့် ယောနယ်ဒေသ စစ်ဘေးရှောင်ပြည်သူမျာများ၏ လိုအပ်ချက်များကို မိမိတို့အစီအစဉ်(အဆက်အသွယ်)ဖြင့်သော်လည်းကောင်း၊ ဂန့်ဂေါ PDF နှင့် ဆက်သွယ်၍ သော်လည်းကောင်း တတ်စွမ်းသမျှကူညီထောက်ပံ့ပေးကြရန် အနူးအညွတ် မေတ္တာရပ်ခံကြောင်း ဂန့်ဂေါ PDFက ထုတ်ပြန်ခဲ့သည်။
စစ်ကောင်စီတပ်သည် ဂန့်ဂေါမြို့နယ်အတွင်းသို့ စက်တင်ဘာကတည်းက ဝင်ရောက်စီးနင်းတိုက်ခိုက်ခဲ့ရာ နှမ်းခါး၊ မြင်သားအပါအဝင် ကျေးရွာအများအပြားမှ ပြည်သူများ အသက်ဆုံးရှုံးခဲ့ရာပြီး စစ်ကောင်စီတပ် ဝင်ရောက်လာစဉ် တောတောင်များ၌ ပုန်းရှောင်နေကြရသည်။ ပြီးခဲ့သည် ဒီဇင်ဘာ ၁၇ရက်ကလည်း စစ်ကောင် စီတပ်က တိုက်ခိုက်ရေး ရဟတ်ယာဉ် အပါအဝင် ရဟတ်ယာဉ် ခြောက်စီးဖြင့် နှမ်းခါးရွာသို့ ပစ်ခတ်တိုက်ခိုက်ခဲ့ရာ ပြည်သူ ၉ဦးနှင့် PDF အချို့ အသက်ဆုံးရှုံးခဲ့ရသည်။