စစ်ကိုင်းတိုင်း ကနီမြို့နယ် ဘန့်ဘွေးကျေးရွာအနီး စစ်ကောင်စီတပ်နှင့် ဒေသကာကွယ်ရေးတပ်တို့ နှစ်ရက်ဆက်တိုက် တိုက်ပွဲဖြစ်ပွားနေကြောင်း ကနီပြည့်သူ့ကာကွယ်ရေးတပ်ဖွဲ့(KLGPDF)က ယနေ့(ဒီဇင်ဘာ ၂၃)ထုတ်ပြန်သည်။
စစ်ကောင်စီတပ်နှင့် ဒေသကာကွယ်ရေးတပ်များကြား ယမန်နေ့(ဒီဇင်ဘာ ၂၂)နံနက်ပိုင်းကတည်းက တိုက်ပွဲများဖြစ်ပွားခဲ့ရာ ယနေ့ညနေပိုင်းအထိ တိုက်ပွဲများဆက်လက်ဖြစ်ပွားနေကြောင်း ထုတ်ပြန်ချက်တွင် ဖော်ပြသည်။
“ ဖြစ်နေတာက မနေ့ကတည်းကဖြစ်နေတာ ခုထိလည်း ဖြစ်နေတာဆိုတော့ တိုက်ပွဲအခြေ အနေက ပြောလို့မရသေးဘူးဗျ။ သူတို့(စစ်ကောင်စီတပ်)ဘက်ကတော့ လက်နက်ကြီးတွေနဲ့ တအုန်းအုန်းလှမ်း ပစ်နေတာဗျ” ဟု KLGPDF မှ တာဝန်ရှိသူတစ်ဦးက ပြောသည်။
လက်ရှိတွင် စစ်ကောင်စီတပ်များက ဘန့်ဘွေးရွာဘုန်းတော်ကြီးကျောင်းအား အကာအကွယ်ယူတပ်စွဲထားပြီး ဒေသကာကွယ်ရေးတပ်များက ကျေးရွာအပြင်ဘက်မှနေ၍ ခုခံတိုက်ခိုက်နေရခြင်းဖြစ်ကြောင်း ၎င်းက ဆက်ပြောသည်။
Public Service Announcement
အထက်ပါ ထိတွေ့တိုက်ပွဲများကြောင့် ဘန့်ဘွေးတောင်ရွာနှင့် မြောက်ရွာတို့ရှိ ဒေသခံပြည်သူအများအပြား ယမန်နေ့ကတည်းက ဘေးလွတ်ရာရှောင်တိမ်းနေကြရကြောင်း ဒေသခံများက ပြောသည်။
ဘန့်ဘွေးရွာ၌ တပ်စွဲထားသော စစ်ကောင်စီတပ်များကို ဒီဇင်ဘာ ၁၉ ရက်က ဒေသကာကွယ် ရေးပူးပေါင်းတပ်များက လက်နက်ကြီးဖြင့် ပစ်ခတ်တိုက်ခိုက်ခဲ့ရာ စစ်ကောင်စီဘက်မှ ၁၃ဦးသေဆုံးပြီး အထိနာခဲ့သည်။
