တနင်္သာရီမြို့နယ်တွင် အကြမ်းဖက်စစ်ကောင်စီတပ်သားများက ပြည်သူတစ်ဦးကို လာဖမ်းစဉ် ဒေသခံကာကွယ် ရေးတပ်ဖွဲ့များက ကြားဖြတ်တိုက်ခိုက်သောကြောင့် အကြမ်းဖက်စစ်သား သုံးဦးသေဆုံးခဲ့ကြောင်း ဒေသခံအချို့က ပြောသည်။
တနင်္သာရီတိုင်း မြိတ်ခရိုင် တနင်္သာရီမြို့နယ် တကူကျေးရွာအနီးရှိ မျှော့အင်းကွမ်းသီးတောမှ ပြည်သူတစ်ဦးကို အကြမ်းဖက်စစ်ကောင်စီတပ်သားခြောက်ဦးနှင့် စစ်ကောင်စီ သတင်းပေး ဦးဗေဒါတို့က ယနေ့ (ဒီဇင်ဘာ ၂၅) လာရောက်ဖမ်းဆီးစဉ်တိုက်ခိုက်မူဖြစ်ပွားခဲ့ခြင်းဖြစ်သည်ဟု ဒေသခံများက ပြောသည်။
အကြမ်းဖက်စစ်ကောင်စီတပ်သားများက လာရောက်ဖမ်းဆီးခဲ့သူကိုမတွေ့ရှိခဲ့ဘဲ အပြန်လမ်းတွင် ဒေသခံကာကွယ်ရေးတပ်ဖြစ်သော ဘက်မလိုက်ပြောက်ကျားအဖွဲ့က တိုက်ခိုက်ခဲ့ခြင်းဖြစ်သည်။ တိုက်ခိုက်မူကြောင့် အကြမ်းဖက်စစ်ကောင်စီ တပ်သား ၃ ဦးသေဆုံးခဲ့သည်။ထို့အပြင်စစ်ကောင်စီ သတင်းပေးဖြစ်သူ ဦးဗေဒါလည်း သေနတ်ဒဏ်ရာရရှိခဲ့သည်ဟု ဒေသခံများက ပြောသည်။
“စစ်သားတွေ ဒဏ်ရာသွားတာကိုတော့တွေ့တယ်။သေမသေတော့ သေချာမသိလိုက်ရဘူး”ဟု ဒေသခံတစ်ဦးကပြောသည်။ ထပ်မံရရှိသောသတင်းအရ သုံးဦးသေဆုံးကြောင်း သိရသည်။
တိုက်ခိုက်ခံရပြီးနောက် အကြမ်းဖက်စစ်ကောင်စီတပ်များက တကူကျေးရွာရှိ စာသင်ကျောင်းရှေ့တွင် ဆိုင်ကယ်များကို စစ်ဆေးခဲ့ပြီး မရပ်ပေးသည့်ဆိုင်ကယ်များကိုလည်း သေနတ်များဖြင့် ပစ်ခတ်ခဲ့သည်ဟု ဒေသခံများက ပြောသည်။
ထိုအတူ ထားဝယ်ခရိုင် ၊ သရက်ချောင်းမြို့နယ်၊ ပိန်းတောရွာတွင်လည်း ယနေ့မွန်းလွဲ ၃နာရီခန့်က အကြမ်းဖက်စစ်ကောင်စီ စစ်ကားနှစ်စီးကို ဒေသခံကာကွယ်ရေးတပ်များက မိုင်းဆွဲတိုက်ခိုက်ခဲ့ကြောင်း ဒေသခံများကပြောသည်။
သို့သော် မိုင်းဆွဲရာတွင်လွဲချော်သွားသည့်အတွက် စစ်ကားများ ထိခိုက်မူကြီးကြီးမားမားမရှိခဲ့ဟုလည်း ဒေသခံများက ပြောသည်။
မိုင်းဆွဲခံရပြီးနောက် အကြမ်းဖက်စစ်ကောင်စီတပ်သားများ ရွာအတွင်းကို ရမ်းသမ်းပစ်ခတ်နေပြီး ထားဝယ်-မြိတ်ကားလမ်းကို ပိတ်ဆို့စစ်ဆေးမူများ ပြုလုပ်ခဲ့သည်ဟု ဒေသခံများက ပြောသည်။