စစ်ကိုင်းတိုင်း မုံရွာမြို့တွင် ယမန်နေ့ညနှင့် ယနေ့မွန်းလွဲပိုင်းက အကြမ်းဖက်စစ်ကောင်စီတပ်အား မြို့ပြပျောက်ကြားတပ်ဖွဲ့များက ခုခံတိုက်ခိုက်ခဲ့ရာ လေးဦးထက်မနည်းသေဆုံးကြောင်း မြို့ခံများက ပြောသည်။
ယနေ့ (ဇန်နဝါရီ ၁ ရက်)နံနက်အစော(ယမန်နေ့ည ၁၂း၃၀) အချိန်က မုံရွာမြို့ပေါ် ဗိုလ်တေဇလမ်းမှ မောင်းနှင်လာသော စစ်ကောင်စီ၏ ကားနှစ်စီးအား ငုဝါလမ်းအကွေ့တွင် ရှေ့ထွက်မိုင်းနှစ်လုံးဖြင့် ဖောက်ခွဲတိုက်ခိုက်ခဲ့ရာ စစ်ကောင်စီတပ် ကားတစ်စီး ပျက်စီးခဲ့ပြီး သုံးဦးထက်မနည်းသေဆုံးသွားကြောင်း Monywa Satan အဖွဲ့ က သတင်းထုတ်ပြန်သည်။
အလားတူ ယနေ့မွန်းလွဲ ၁ နာရီခန့်က မုံရွာမြို့တွင် ကြမ်းတမ်းစွာစစ်ဆေးမှုကြောင့် နာမည်ကြီးနေသည့် မြို့ပေါ်စစ်ဆေးရေးဂိတ်တစ်ခုဖြစ်သော မိုးကောင်းစစ်ဆေးရေးဂိတ်အား မြို့ပြပြောက်ကျားတပ်ဖွဲ့များဖြစ်သော Northwest Plains Revolutionary Force,South Monywa-PDFနှင့် Monywa Heroes Group မဟာမိတ်တပ်ဖွဲ့များမှ သေနတ်ဖြင့် ၅ချက်ပစ်ခတ်တိုက်ခိုက်ခဲ့ရာ စစ်ကောင်စီတပ်သား၁ဦး သေဆုံးခဲ့ကြောင်း ၎င်းအဖွဲ့များက ထုတ်ပြန်အသိပေးသည်။
ယနေ့ညနေ ၆ နာရီဝန်းကျင်က မုံရွာမြို့ ဒေါင်းကျောင်းနှင့် ကံဦးကျောင်းကြား ရှောက်ခါး ရပ်ကွက်အတွင်းသို့ အကြမ်းဖက်စစ်ကောင်စီတပ်များ ဝင်ရောက်အကြမ်းဖက်စစ်ဆေးနေပြီး နေ့လယ်ပိုင်းက ဗုံးပေါက်ကွဲမှုနှင့်ပတ်သက်၍ လာရှာနေသည်ဟုသိရကြောင်း၊ အမျိုးသားတစ်ဦး ကျည်ထိမှန်ဒဏ်ရာရထားကြောင်း မြို့ခံတစ်ဦးက ပြောသည်။
Public Service Announcement
မုံရွာမြို့ပေါ်တွင် ယမန်နေ့တစ်နေ့လုံးမှညပိုင်းအထိ အကြမ်းဖက်စစ်ကောင်စီတပ်များအား မြို့ပြ ပြောက်ကျားအဖွဲ့များက ပြင်းပြင်းထန်ထန်ခုခံတိုက်ခိုက်နေကြသည်။
