စစ်ကိုင်းတိုင်း ရေဦးမြို့နယ် အင်တောကျေးရွာတွင် အကြမ်းဖက်စစ်ကောင်စီတပ်မှ ရွာကျောင်းကော်မတီဝင် အမျိုးသားနှစ်ဦးကို သတ်ဖြတ်မီးရှိူ့သွားကြောင်း ဒေသခံများက ပြောသည်။
အင်တောကျေးရွာမှ အသက် ၄၅ နှစ်အရွယ် ဦးမောင်မြင့်နှင့် အသက် ၄၀ နှစ်အရွယ် ဦးတင်သောင်းတို့ကို ဇန်နဝါရီ ၂ ရက် နံနက် ၁၁ နာရီခန့်တွင် အကြမ်းဖက်စစ်ကောင်စီတပ်မှ ဖမ်းဆီးသွားခဲ့ပြီး ယမန်နေ့ ဇန်နဝါရီ ၅ ရက်တွင်မူ ၎င်းတို့နှစ်ဦးရုပ်အလောင်းများအား ကျေးရွာစာသင်ကျောင်းအနောက်ဘက်တွင် သတ်ဖြတ်မီးရှို့ထားသည်ကို တွေ့ရှိခဲ့ရကြောင်း ဒေသခံများက ပြောသည်။
အင်တောကျေးရွာတွင် ပျူစောထီးအဖွဲ့ဝင်များလည်းရှိပြီး လွန်ခဲ့သည့်တစ်လခန့်က ပျူစောထီးအဖွဲ့ဝင်တစ်ဦးလည်းသတ်ဖြတ်ခံရဖူးပြီးကျေးရွာအုပ်ချုပ်ရေးမှူးလည်း ပစ်ခတ်ခံရဖူးကြောင်း ဒေသခံများကပြောသည်။
ဇန်နဝါရီ ၂ ရက်မွန်းလွဲပိုင်းက အင်တောရွာ စာသင်ကျောင်းအတွင်း အထိုင်ချထားသည့်စစ်ကောင်စီတပ်အား ပကဖ/PDFတို့က ပြောက်ကြားစနစ်ဖြင့် အနီးကပ် ပစ်ခတ်ခဲ့ရာ စကစဘက်မှ ၃ ဦးသေဆုံးခဲ့သည်ဟုသိရကြောင်း ဒေသခံများက ပြောသည်။
အင်တောကျေးရွာသည် ရေဦးမြို့နှင့် တန့်ဆည်မြို့ကြား ရေဦးမြို့နှင့် ၇ မိုင်အကွာခန့်တွင်တည်ရှိသည်။