▪️ပြည့်သူ့ရဲဘော် တစ်ဦးကျဆုံးပြီး သုံးဦးဒဏ်ရာရထားဟု KNDFထုတ်ပြန်
လွိုင်ကော်မြို့ ပန်ကန်းနှင့် မိုင်းလုံးရပ်ကွက်အတွင်း တိုက်ပွဲပြင်းထန်နေပြီး အကြမ်းဖက် စစ်ကောင်စီတပ်မှ လေးဦးသေဆုံးကာ အများအပြားထိခိုက် ဒဏ်ရာရနိုင်ကြောင်း ကရင်နီအမျိုးသားကာကွယ်ရေးတပ်(KNDF) က ယနေ့ညပိုင်းတွင် ထုတ်ပြန်သည်။
ယနေ့(ဇန်နဝါရီ ၇ ရက်) နံနက် အစောပိုင်းကစ၍ ယခုည ၈နာရီခန့်အထိ တိုက်ပွဲပြင်းထန်နေပြီး အကြမ်းဖက်စစ်ကောင်စီတပ်ဖက်မှ အနည်းဆုံးလေး သေဆုံးကာ အများအပြားထိခိုက် ဒဏ်ရာရနိုင်ကြောင်း KNDFက ဆိုသည်။
KNDF ဘက်မှလည်း ရဲဘော်သုံးဦးဒဏ်ရာရရှိထားပြီး တစ်ဦးကျဆုံးကာ ကျဆုံးသွားသော ရဲဘော်အား အာဇာနည်သူရဲကောင်းအဖြစ်မှတ်တမ်းတင် အလေးပြုကြောင်း KNDF က အသိပေးထားသည်။
Public Service Announcement
“ပိတ်မိတဲ့ ပြည်သူကို သွားရောက်ကယ်ဆယ်ရင်း လက်နက်ကြီးကျလို့ ကျဆုံးသွားတဲ့ ကျောင်းဆရာ နိုင်လင်းအား မိမိတို့မှ အလေးနီပြုပါသည်။ ကရင်နီပြည်ရဲ့ ကျောင်းဆရာတွေဟာ ပေးဆပ်မှုတွေ အင်မတန်မှ ကြီးမားနေပြီ”ဟု တိုးတက်သော ကရင်နီပြည်သူ့အင်အားစု(PKPF)က ဆိုသည်။
ထို့အပြင် အကြမ်းဖက်စစ် ကောင်စီတပ်များမှ ပစ်မှတ်ထားတိုက်ခိုက်မှုကြောင့် အရပ်သားပြည်သူအချို့ ထိခိုက်ဒဏ်ရာရခဲ့သည့်အပြင် အပြစ်မဲ့ ပြည်သူခြောက်ဦးသေဆုံးခဲ့ရသည်။
တိုက်ပွဲအတွင်း သေဆုံးခဲ့ရသော ပြည်သူများအတွက် KNDF မှ မိသားစုများနှင့် ထပ်ထူဝမ်းနည််းကြောင်း ထုတ်ပြန်ချက်တွင် ဖော်ပြသည်။
အကြမ်းဖက်စစ်ကောင်စီတပ်ဖွဲ့များမှ လက်နက်ကြီးများဖြင့် ရမ်းသမ်းပစ်ခတ်ခြင်း၊ အရပ်သား ပြည်သူများကို ပစ်မှတ်ထားတိုက်ခိုက်ခြင်း နှင့် လူနေအိမ်များကို မီးရှို့ဖျက်စီးခြင်းများ ပြုလုပ်လျက်ရှိသဖြင့် ရပ်ကွက်နေပြည်သူများ စစ်ဘေးလွတ်ရာသို့ ထွက်ပြေးတိမ်းရှောင်နေရသည်။
အကြမ်းဖက် စစ်ကောင်စီတပ်များမှ ဒီးမော့ဆိုမြို့နယ် (၅) မိုင်၊ (၆) မိုင် နှင့် ဒေါပိုးစီတို့တွင် နေအိမ် စုစုပေါင်း ၁၈ လုံးကို မီးရှို့ဖျက်စီးခဲ့သည်။
မြို့ပြတိုက်ပွဲသည် လွိုင်ကော်မြို့အတွင်းသို့ ကူးစက်လာပြီးဖြစ်ရာ ပြည်သူများအနေဖြင့် မိမိတို့၏ လုံခြုံရေးအတွက် စစ်ဘေးလွတ်ရာသို့ အမြန်ဆုံးတိမ်းရှောင်ကြရန် KNDF က တိုက်တွန်းသည်။
စစ်ကောင်စီတပ်များ အမြစ်ပြတ်သည်အထိ တိုက်ပွဲဝင်သွားမည်ဖြစ်ကြောင်း ကျဆုံးသွားသော ရဲဘော်များနှင့် ပြည်သူများကို တိုင်တည်၍ KNDF က အဓိဌာန်ပြုသည်။
