■အလောင်းလာမကောက်သေးဟု ARA ပြော
စစ်ကိုင်းတိုင်း၊အရာတော်မြို့နယ် မြောက်ပိုင်းရှိ ကျေးရွာများကို စစ်ကြောင်းထိုးနေသော အကြမ်းဖက်စစ် ကောင်စီတပ်ကို မိုင်းဆွဲတိုက်ခိုက်ရာ သေဆုံးသူ ၁၀ ဦးထက်မနည်း ရှိနိုင်သည်ဟု အရာတော်မြို့နယ် သတင်းမှန်ပြန်ကြားရေးက ထုတ်ပြန် သည်။
ယနေ့ ( ဇန်နဝါရီ၁၃ရက်) နံနက်(၈)နာရီခွဲခန့်က အရာတော်မြောက်နယ်၊ ကြာပင်လှကျေးရွာအနီးတွင် အကြမ်းဖက်စစ်ကောင်စီခြေလျင်တပ်ဖွဲ့များကို ARA မြောက်ပိုင်းတပ်ဖွဲ့များက မိုင်းဆွဲတိုက်ခိုက်ခဲ့ခြင်းဖြစ်သည်။
“ဒီလ ၉ ရက်နေ့လောက်ကတည်းက အရာတော် မြောက်ပိုင်းဘက်က ရွာတွေကို ဝင်စီးနေတာ။အင်းအား ၅၀ လောက်နဲ့။ဒီနေ့ ငြိမ်းစံ ကျေးရွာဘက်ကနေ ထွက်လာမယ် လို့ သတင်းရတာနဲ့ ကြိုတိုက်နိုင်ခဲ့တာ”ဟု ARA မှ ဗိုလ်ပေါက်စီက People’s Spring သတင်းဌာနသို့ ပြောသည်။
Public Service Announcement
မိုင်းဆွဲတိုက်ခိုက်မှုတွင် စစ်ကောင်စီတပ်သားတချို့မှာ မိုင်းကွင်းပေါ်တွင် မြောက်တက်သွားပြီး သေဆုံးသူ(၁၀)ဦးထက်မနည်းရှိနိုင်သည်ဟု ARA က ထုတ်ပြန်သည်။
ပေါက်ကွဲမှုပြင်းထန်၍ ဒဏ်ရာရရှိသွားသူ စစ်သား(၂၀)ဦးခန့်ထိ ရှိနိုင်ပြီး ဖြစ်စဉ်နေရာတွင် ကျန်ခဲ့သော အလောင်းများကို ယနေ့မွန်းလွဲပိုင်းအထိ လာရောက်ကောက်ယူနိုင်ခြင်းမရှိသေးကြောင်း အရာတော်မြို့နယ်သတင်းမှန်ပြန်ကြားရေးက အသိပေးသည်။
“၅ ယောက်ကို လာမကောက်သေးဘူးလို့သိရပါတယ်ဗျအခု ကုန်းသာရွာကို ဆက်သွားပါပြီ။”ဟု အရာတော်မြို့နယ်တော်လှန်ရေးအင်အားစုမှ တာဝန်ရှိသူက ပြောသည်။
အဆိုပါ စစ်ကောင်စီတပ်ဖွဲ့များသည် အရာတော်မြောက်နယ်မှ ကျေးရွာများကို (၄)ရက်တိုင် လှည့်ပတ်၍ ရှာဖွေရေးလုပ်နေသော ခြေလျင်စစ်ကြောင်းဖြစ်ပြီး ယနေ့ ငြိမ်းစံရွာမှ ကြာပင်လှရွာဘက်သို့အသွားတွင် တိုက်ခိုက်ဆုံးမပေးခဲ့ခြင်းဖြစ်သည်ဟု လျှပ်စီးမိုးကြိုးမုန်တိုင်း(ARA မြောက်ပိုင်း)က ပြောသည်။
ဇန်နဝါရီ ၁၂ ရက်ကလည်း အရာတော် အရှေ့ပိုင်းရှိ သမ္မရိုးကျေးရွာမှ ပျူစောထီး အလောင်း လာကောက်သည့် စစ်ကောင်စီ ယာဥ်တန်းကို မိုင်းဆွဲတိုက်ခိုက်ခဲ့ရာ စစ်ကောင်စီတပ်သား နှင့် ပျူစောထီ အဖွဲ့မှ ခုနှစ်ဦးသေဆုံးခဲ့ကြောင်း လည်း ARA က ထုတ်ပြန်ထားသည်။
