စစ်ကောင်စီတပ်မီးရှို့ခဲ့သည့် နတ်ချောင်းရွာမှနေအိမ်များ

စစ်ကိုင်းတိုင်း ကလေးမြို့နယ် နတ်ချောင်းရွာကို စစ်ကောင်စီတပ်က ဒီဇင်ဘာ လအတွင်းက ဝင်ရောက်စီးနင်းပြီး နေအိမ်များကို အကြိမ်ကြိမ်မီးရှို့ဖျက်ဆီးခဲ့ရာ Natchaung Youth Foundationက မီးရှို့ ဖျက်ဆီးခံရသည့် နေအိမ်များကို နေအိမ်ပိုင်ရှင်များ၏ အမည်များဖြင့် ပူးတွဲပြီး ယနေ့ဖော်ပြခဲ့သည်။

“ရွာအခြေအနေက အခုလောလောဆယ် တချို့တဝက် ရွာထဲ ပြန်ကြတဲ့သူ ပြန်ကြတယ်။ အိမ်ကတော့ နောက်ပိုင်း အသစ်ထပ်ရှို့တာမျိုးတော့မရှိဘူး။ အရင်တုန်းက ရှို့ထားတာတွေက စုစုပေါင်း ၂၈အိမ်လောက်ရှိမယ်” ဟု နတ်ချောင်းဒေသခံက ပြောသည်။

စစ်ကောင်စီတပ်သည် ဒီဇင်ဘာ ၂၂ရက်မှစ၍ နတ်ချောင်းရွာသို့ ဝင်ရောက်အကြမ်းဖက်ခဲ့၍ ဒေသခံများလည်း ထွက်ပြေးတိမ်းရှောင်ခဲ့ရပြီး လက်ရှိအချိန်ထိ နေအိမ်များသို့မပြန်ရဲဘဲ တောတော်များ၌ တိမ်းရှောင်ခိုလှုံနေသူများ ရှိနေသည်။

နတ်ချောင်းရွာတွင် အိမ်ခြေ ၂၀၀၀ ကျော်ရှိပြီး စစ်ရှောင်များအနေဖြင့် စားဝတ်နေထိုင်းရေ အခက်အခဲများ ကြုံနေရပြီး အရေးပေါ်အကူအညီများလိုအပ်လျက်ရှိသည်ဟုဆိုသည်။

Public Service Announcement

စစ်ကောင်စီတပ်အနေဖြင့် ကျေးရွာသို့ ဝင်ရောက်စဉ် ဒေသခံများကို ဖမ်းဆီးသတ်ဖြတ်ခြင်းများလုပ်ဆောင်ခဲ့ကြောင်း၊ ဒေသခံ ပြည်သူ့ကာကွယ်ရေးတပ်ဖွဲ့များနှင့်လည်း တိုက်ပွဲများ ဖြစ်ပွားခဲ့ကြောင်း နတ်ချောင်းရွာခံက ပြောသည်။