ကလေး-ဖလမ်းလမ်းတွင် အကြမ်းဖက်စစ်ကောင်စီတပ်နှင့် ဖလမ်းအခြေစိုက်ဒေသခံကာကွယ်ရေးတပ်ဖွဲ့တစ်ခုဖြစ်သည့် CNDFတို့ တိုက်ပွဲဖြစ်ပွားနေပြီး နှစ်ရက်အတွင်းအကြမ်းဖက်စစ်ကောင်စီတပ်သား ၂၅ ဦးသေဆုံးခဲ့သည်ဟု ဖလမ်းအခြေစိုက် ချင်းအမျိုးသားအဖွဲ့ချုပ်(CNO) က ယနေ့ သတင်းထုတ်ပြန်သည်။
ယမန့်နေ့က ဖလမ်းမြို့နယ်၊ ပါရ်သဲ ကျေးရွာ အနီး တိုက်ပွဲတွင်စစ်ကောင်စီတပ်သား ၁၇ ဦးနှင့် ယနေ့ လာသီးကျေးရွာအနီးတွင်ဖြစ်ပွားသည့် တိုက်ပွဲတွင် ၈ ဦး နှစ်ရက်အတွင်း စုစုပေါင်း ၂၅ ဦးသေဆုံးခဲ့ခြင်းဖြစ်သည်ဟု ထုတ်ပြန်ချက်တွင်ဖော်ပြထားသည်။
ဇန်နဝါရီ ၁၆ ရက်နေ့က ဖလမ်းမြို့နယ်၊ ပါရ်သဲ ကျေးရွာ အနီးတွင် စစ်ကြောင်းထိုးလာသော အကြမ်းဖက်စစ်ကောင်စီတပ်ကို CNDF တပ်ဖွဲ့ဝင်များမှ ခုခံတိုက်ခိုက်ခဲ့ခြင်းဖြစ်သည်။ ထိုတိုက်ပွဲအတွင်း ဖလမ်းမြို့ အခြေစိုက် ခလ၇ ၂၆၈ မှ လက်နက်ကြီးဖြင့် ၄ ကြိမ် ပစ်ကူခဲ့သည်ဟု သိရသည်။ အဆိုပါတိုက်ပွဲတွင် အကြမ်းဖက်စစ်ကောင်စီဘက်မှ ၁၇ ဦး သေဆုံးပြီး ဒဏ်ရာရရှိသူများလည်း ရှိသည်ဟုဆိုသည်။ CNDF ဘက်မှ ၁ ဦး ဒဏ်ရာ(မစိုးရိမ်ရ) ရရှိခဲ့သည်ဟု သတင်းထုတ်ပြန်ထားသည်။
ယနေ့ လာသီးကျေးရွာအနီးတိုက်ပွဲတွင်စစ်ကောင်စီတပ်ဘက်မှ ၈ ဦးသေဆုံးပြီး CNDFမှ ထိခိုက်သူမရှိခဲ့ဟုပါရှိသည်။ အကြမ်းဖက်စစ်ကောင်စီတပ်များက ဇန်နဝါရီ ၆ ရက် ကတည်းပင် ချင်းတောင်ပေါ်ကို အင်အားအလုံးအရင်းဖြင့် ထိုးစစ်ဆင်နေခြင်းဖြစ်သည်။
Public Service Announcement
