နတ်ချောင်းရွာတိုက်ပွဲတွင် ကျဆုံးခဲ့သည့် ပြည်သူ့ကာ ကွယ်ရေးတပ်ဖွဲ့ဝင် လေးဦးအတွက် သက်ပျောက်တရား နာခြင်း၊ အမိန့်ပြန်တမ်းထုတ်ပြန်ခြင်း၊ ဂုဏ်ပြုသေနတ်ပစ်ဖောက်ခြင်းတို့ပြုလုပ်ကာနာရေးအခမ်းအနားကို ယနေ့ ပြုလုပ်ခဲ့သည်။
၂၀၂၁ ဒီဇင်ဘာ ၂၆ရက်ညက ကလေးမြို့ နတ်ချောင်းရွာကို အကြမ်းဖက်ကောင်စီက စစ်ကြောင်းထိုးစဥ် ပြည်သူအား ကာကွယ်ရင်း ကျဆုံးခဲ့သော ပြည်သူ့ကာကွယ်ရေးတပ်ဖွဲ့ဝင်လေးဦး၏ နာရေးအခမ်းအနားကို ယနေ့( ဇနဝါရီ၁၉ရက်) နံနက်ပိုင်းတွင် နတ်ချောင်းသုသာန်၌ ပြုလုပ်ခြင်းဖြစ်သည်။
ကျဆုံးခဲ့သူ လေးဦးမှာ ကိုငယ်လေး(၄၀နှစ်)၊ ကိုအဲသား(၄၀နှစ်) ၊ကိုအဲပွေ(၄၆နှစ်) နှင့်ကိုငွေသွား(၄၄နှစ်) တို့ဖြစ်သည်ဟု နတ်ချောင်းရွာကာကွယ်ရေးအဖွဲ့က သတင်း ထုတ်ပြန်ထားသည်။
“ပြည်သူဘက်က ရပ်တည်ကာကွယ်ခဲ့ကြသော ကျဆုံးသူရဲကောင်းများ ကောင်းရာဘုံဘ၀မှာ အေးချမ်းနိုင်ကြပါစေ”
Public Service Announcement
“အသက်စွန့်ပေးဆပ်ခဲ့ကြတဲ့ ရဲဘော်အပေါင်းတို့အား တိုင်တည်လျက် စစ်အာဏာရှင်စနစ်အမြစ်ဖြုတ်တော်လှန်ရေး အောင်မြင်သည်အထိ ဆက်လက်တိုက်ပွဲ၀င်ကြပါမည်ဟု ပြည်သူ့ရှေ့မှောက်တွင် သစ္စာပြုလိုက်ပါသည် ” ဟု ကျဆုံးသူလေးဦးအား တိုင်တည်ကာ နတ်ချောင်းရွာကာကွယ်ရေးအဖွဲ့က သစ္စာဆိုခဲ့ကြသည်။
ပြီးခဲ့သည့်ဒီဇင်ဘာလအတွင်းအကြမ်းဖက်ကောင်စီက နတ်ချောင်းရွာအား လေကြောင်းမှ တိုက်ခိုက်ခဲ့သလို မြေပြင်တွင် အရပ်သားများအား သတ်ဖြတ်ခြင်း၊ နေအိမ်များအား မီးရှို့ခြင်းများ ပြုလုပ်ခဲ့သည်။ နတ်ချောင်းဒေသခံအရပ်သား ၂၀ဦးထက်မနည်း အသတ်ခံခဲ့ရပြီး အိမ်ခြေ ၄၀ ကျော် မီးရှို့ဖျက်ဆီးခံခဲ့ရသည်။ ဒေသခံအများစုသည် နေရပ်စွန့်ခွာ ထွက်ပြေးတိမ်းရှောင်နေရဆဲဖြစ်သည်။
