ရေလယ်ကျွန်းတွင် စစ်​ကောင်စီတပ်ကို ​ဒေသတွင်းမဟာမိတ်များ ပူး​ပေါင်းတိုက်ခိုက်

မကွေးတိုင်း ရေစကြိုမြို့နယ် ရေလယ်ကျွန်းဒေသသို့ရောက်ရှိလာသော အကြမ်းဖက်စစ်ကောင်စီတပ်အား ဒေသတွင်းမဟာမိတ်အဖွဲ့များက ခုခံတိုက်ခိုက်ခဲ့ကြသည်။

ယမန်နေ့ ဇန်နဝါရီ ၂၀ ရက် ညနေ ၃နာရီဝန်းကျင်ခန့်က အင်အားအလုံးအရင်းဖြင့် ရောက်ရှိလာသော အကြမ်းဖက်စစ်ကောင်စီတပ်များကို ရေစကြိုမြို့နယ် ရေလယ်ကျွန်းဒေသ နေရင်းကျေးရွာနှင့် မင်းရွာကျေးရွာကြား အရောက်တွင် ပြည်သူ့ကာကွယ်ရေးတပ်ဖွဲ့များနှင့် K.N.Tပြောက်ကျားတပ်ဖွဲ့မှ စုပေါင်းတိုက်ခိုက်ခဲ့ကြခြင်းဖြစ်သည် ။

အကြမ်းဖက် စစ်ကောင်စီတပ်များသည် မင်းရွာကျေးရွာအတွင်းရှိ နေအိမ်များသို့ဦးတည်ပြီး လက်နက်ကြီးများဖြင့်လည်း အချက်ပေါင်းများစွာပစ်ခတ်ခဲ့ကြောင်း၊ ၁၅မိနစ်ခန့် အပြန်အလှန်ပစ်ခတ်ခဲ့ကြပြီး တိုက်ပွဲပြင်းထန်ခဲ့သည့်အဆိုပါတိုက်ပွဲတွင် ပြည်သူ့ကာကွယ် ရေးတပ်ဖွဲ့များမှ ရဲဘော်များ အထိခိုက်မရှိ ဆုတ်ခွာနိုင်ခဲ့ကြောင်းမဟာမိတ်အဖွဲ့များက ပြောသည်။

“စစ်တပ်က ရေလယ်ကျွန်းကို ဇက်ဆိပ်ကမလာပဲ တောင်ဘက်နွယ်နီ အောင်ပန်းချောင်းဘက်က စက်လှေနဲ့ လာတာပါ။ အလစ်အငိုက်မိမှာစိုးရိမ်တယ်။”ဟု ရေလယ်ကျွန်းဒေသခံတစ်ဦးက ​ပြောသည်။

Public Service Announcement

Phoenixအထူးပြောက်ကျားတပ်ဖွဲ့ ၊KNTပြောက်ကျားတပ်ဖွဲ့၊ ပြည်သူကာကွယ်ရေးတပ်ဖွဲ့ ရေစကြိုနှင့် မဟာမိတ်ပူးပေါင်းအဖွဲ့များက ခုခံတိုက်ခိုက်ခဲ့ကြခြင်းဖြစ်ပြီး အကြမ်းဖက်စစ်တပ်၏ အထိခိုက်အကျဆုံးကိုလည်း အတိအကျမသိရှိရသေးကြောင်း ၎င်းတို့ကအသိပေးသည်။

အကြမ်းဖက်စစ်ကောင်စီတပ်သည်မကွေးတိုင်း၊စစ်ကိုင်းတိုင်း၊ မန္တလေးတိုင်းတို့ဆုံရာကျွန်းပေါ်ကျေးရွာများတွင်ပါဝင်သည့် ရေစကြိုရေလယ်ကျွန်းဒေသကို မကြာခဏစစ်ကြောင်းထိုးကာ အကြမ်းဖက်နေ၍ ဒေသခံများလည်းတိမ်းရှောင်နေရပြီး ဒေသတွင်းပြည်သူ့ကာကွယ်ရေးအဖွဲ့များက ခုခံတိုက်ခိုက်နေကြသည်။