ရန်ကုန်မြို့ မဂ်လာဒုံမြို့နယ်ရှိ အကြမ်းဖက်စစ်ကောင်စီ လေတပ်ဌာနချုပ် ဝင်ထွက်ဂိတ်အား ဗုံးပစ်တိုက်ခိုက်ခဲ့ကြောင်း မြို့ပြပြောက်ကျားတပ်ဖွဲ့ Dictator Revolt Front(DRF)က ယနေ့ (ဇန်နဝါရီ ၂၁) ထုတ်ပြန်သည်။
အဆိုပါတိုက်ခိုက်မှုကြောင့် လေတပ်ဂိတ်မှ အစောင့်စစ်သားလေးဦး သေဆုံးနိုင်ဖွယ်ရှိပြီး ဂိတ်တဲအဆောက်အအုံပြိုကျသွားကြောင်း ထုတ်ပြန်ချက်တွင် ဖော်ပြသည်။
“အာဏာရှင်တော်လှန်ရေးအတွက် သေမင်းဆီမှာ အသက်ကို အပေါင်ထားပြီး တိုက်ပွဲဝင်နေကြတဲ့ မြို့ပြပြောက်ကျားအဖွဲ့တွေကို ပြည်သူ များအနေဖြင့် တတ်နိုင်တဲ့ဘက်က ပူးပေါင်းပါဝင်ကူညီကြဖို့ မေတ္တာရပ်ခံပါတယ်”ဟု DRF တပ်ဖွဲ့မှ တော်လှန်ရေးရဲဘော်တစ်ဦးက မှတ်ချက်ပေးသည်။
ပြီးခဲ့သည့်နှစ် နိုဝင်ဘာ ၇ ရက်ကလည်း မဂ်လာဒုံမြို့နယ် အနမ်းပင်ရပ်ကွက် ခရေပင်ရိပ်မွန်လမ်းရှိ လေတပ်စခန်းအဝင်အထွက်ဂိတ်တစ်ခုအား မြို့ပြပြောက်ကျားတပ်ဖွဲ့တစ်ခုက ပစ်ခတ်တိုက်ခိုက်ခဲ့ရာ အစောင့်တပ်သားနှစ်ဦး သေဆုံးခဲ့သည်။