ချင်းပြည်နယ်၊ရေဇွာမြို့တွင် အကြမ်းဖက်စစ်ကောင်စီနှင့် ဒေသခံကာကွယ်ရေးတပ်များကြား ယမန့်နေ့က တိုက်ပွဲဖြစ်ပွားပြီး အကြမ်းဖက်စစ်ကောင်စီဘက်မှ ၃ဦးသေဆုံးပြီး ဒေသခံကာကွယ်ရေးတပ်ဖွဲ့က တပ်ရင်းမှူးတစ်ဦး ကျဆုံး ခဲ့ကြောင်း ဒေသခံကာကွယ်ရေးတပ်များက သတင်းထုတ်ပြန်ထားသည်။
အကြမ်းဖက်စစ်ကောင်စီတပ်များသည် ယမန်နေ့ မွန်းလွဲ ၂နာရီမှစတင်ပြီး ရေဇွာမြို့ထဲကို အင်အားအလုံးအရင်းဖြင့် ဝင်ရောက်ခဲ့ခြင်းကြောင့် တိုက်ပွဲပြင်းထန်စွာဖြစ်ပွားခဲ့ခြင်းဖြစ်သည်ဟု ချင်းပြည်ကာကွယ်ရေးတပ်(ဇိုတုန်)က ယနေ့ (ဇန်နဝါရီ ၂၄ တွင်)ထုတ်ပြန်သည်။
ဒေသခံကာကွယ်ရေးတပ်များက ခုခံတိုက်ခိုက်သော်လည်း အင်အားမမျှ၍ ဆုတ်ခွာခဲ့ရသည်ဟုဆိုသည်။ ထိုတိုက်ပွဲတွင် အကြမ်းဖက်စစ်ကောင်စီဘက် ၃ဦးသေဆုံးပြီး၊ ချင်းပြည်ကာကွယ်ရေးတပ်(မတူပီ) တပ်ရင်း(၂ ) မှတပ်ရင်းမှူး ဆလိုင်းဆန်ထာ ကျဆုံးခဲ့ရသည်ဟု ဒေသခံကာကွယ်ရေးတပ်များထံမှ သိရသည်။ ထိုပြင် CDF(မရာ) မှ တပ်သားတစ်ဦးလည်း ဒဏ်ရာရရှိခဲ့သည်ဟု CDF(ဇိုတုန်)က ထုတ်ပြန်ထားသည်။
အကြမ်းဖက်စစ်ကောင်စီသည် တိုက်ပွဲအတွင်း အပြန်အလှန်ပစ်ခတ်မူ ရပ်နားခဲ့သော်လည်း ၎င်းတို့ တပ်ဆွဲထားရာ ရေဇွာတပ်ကုန်းမှ ရေဇွာမြို့တွင်းလူနေရပ်ကွက်များနှင့် မြို့အနီးရှိ ရွာဗားကျေးရွာ၊ ဆော်တီးကျေးရွာ၊ ဟရင်ထန်ကျေးရွာများအတွင်းကို လက်နက်ကြီးများဖြင့် ဆက်တိုက်ပစ်ခတ်ခဲ့သည်ဟု ထုတ်ပြန်ချက်တွင်ပါရှိသည်။
Public Service Announcement
ထိုလုပ်ရပ်များသည် ပြည်သူများ စိတ်ဓာတ်ရေးရာခြောက်ခြားစေရန် အသက်အန္တရာယ်ခြိမ်းခြောက်ခြင်းဖြစ်သည်ဟုလည်းထုတ်ပြန်သည်။ ဇန်နဝါရီ လဆန်းပိုင်းမှ စတင်ပြီး အကြမ်းဖက်စစ်ကောင်စီတပ်များသည် ချင်းပြည်နယ်အတွင်း ကြည်းကြောင်း ၊လေကြောင်းတို့မှ အပြင်းအထန်စစ်ကြောင်းထိုးနေသည်။ဒေသခံကာကွယ်ရေးတပ်များကလည်း စုပေါင်း၍ခုခံတိုက်ခိုက်နေသည်။
