ဖက်ဒရယ်ဒီမိုကရေစီရရှိရေး၊ ကိုယ်ပိုင်ပြဌာန်းခွင့်ရရှိရေးနှင့် တန်းတူညီမျှမှုရရှိရေးတို့အတွက် အကြမ်းဖက်စစ်ကောင်စီအား အမြစ်ပြတ်ချေမှုန်းပြီး အနာဂတ် ချင်းပြည်ထောင် တည်ဆောက်ရေးတွင် အတူလက်တွဲတိုက်ပွဲဝင်ကြရန် တိုက် တွန်းနှိုးဆော်ကြောင်း ကန်ပက်လက်မြို့နယ် ချင်းကာကွယ်ရေးတပ်ဖွဲ့(CDF) က ယနေ့ ထုတ်ပြန်သည်။
အာဏာသိမ်းမှုနောက်ပိုင်းတွင် နိုင်ငံတစ်ဝှမ်းလုံး၌ပြည်သူ့ဝန်ထမ်းများ၏ အကြမ်းမဖက်အာဏာဖီဆန်ရေးလှုပ်ရှားမှု(CDM)ပြုလုပ်ခြင်း လူထုတစ်ရပ်လုံး၏ လမ်းပေါ်ထွက် ဆန္ဒထုတ်ဖော်ခြင်းမှစတင်ကာ ရရာလက်နက်စွဲကိုင်တော်လှန်ခြင်းများအထိ ဖြစ်ပွားနေကြောင်း ဖော်ပြထားသည်။
အကြမ်းဖက် စစ်ကောင်စီအနေဖြင့်လည်း ချင်းပြည်နယ်အပါအဝင် တိုင်းရင်းသားဒေသများတွင် ထိုးစစ်ဆင်ကာ စစ်ရေးတင်းမာမှုများ ဆက်တိုက်ဖြစ်ပေါ်လျက်ရှိသည်ဟု ဆိုသည်။
ထို့ကြောင့် ချင်းပြည်နယ်ရှိ အသက် ၁၈နှစ်နှင့် အသက် ၄၀ကြား လူငယ်၊လူလတ်ပိုင်းများအနေဖြင့် အမိချင်းပြည်ကို စွန့်ခွာကာ ပြည်ပနိုင်ငံများသို့ ထွက်ခွာခြင်း၊တော်လှန်ရေးကိုမျက်ကွယ်ပြုခြင်းမလုပ်ကြရန် လေးနက်စွာတိုက်တွန်းသည်ဟု ထုတ်ပြန်သည်။
Public Service Announcement
(ဖက်ဒရယ်ဒီမိုကရေစီ ပေါ်ထွန်းလာရေးအတွက် တိုက်ပွဲဝင်နေကြသော CDF-Kanpetlet မှ တပ်ရင်းအလိုက် ပြည်သူ့ရဲဘော်များ၏ လှုပ်ရှားမှုပုံရိပ်များ၊ ဓာတ်ပုံ-CDF-Kanpetlet(K2))
