▪️၂၀၂၀ရွေးကောက်ပွဲ အနိုင်ရလွှတ်တော်ကိုယ်စား လှယ်များဖြင့် ပြည်ထောင်စုလွှတ်တော်အစည်းအဝေးခေါ်ယူ
စစ်အာဏာရှင်များ၏ တရားဝင်မှုကို ငြင်းပယ်နိုင်ရေး၊ အမျိုးသားညီညွတ်ရေးအစိုးရ၏ တရားဝင်မှုကိုခိုင်မာစေရေးနှင့် ဒီမိုကရေစီ ဆက်လက်ရှင်သန်နိုင်ရေး ပြည်ထောင်စုလွှတ်တော်ကို ဆက်လက်ကျင်းပနေရန်လိုအပ်ကြောင်း ယာယီသမ္မတ ဒူဝါလရှီးလက ပြောကြား သည်။
ယနေ့(ဖေဖော်ဝါရီ ၅ ရက်)ခေါ်ယူကျင်းပသော ပြည်ထောင်စုလွတ်တော် တတိယအကြိမ်အစည်းအဝေးသို့ အမျိုးသားညီညွတ်ရေးအစိုးရ(NUG) ယာယီသမ္မတက တက်ရောက်မိန့်ခွန်း ပြောကြားစဉ် ဒီမိုကရေစီစနစ် ရှင်သန်ရန် ပြည်သူများရွေးချယ်ထားသည့် လွှတ်တော်ရှိရမည်ဟု ထည့်သွင်းပြောကြားသည်။
“လွှတ်တော်ကို ပြည်သူလူထုက ရွေးချယ်တင်မြှောက်ထားသူနဲ့ ဖွဲ့စည်းထားတာ ဖြစ်ပါတယ်။ အဆောက်အအုံတွေ (building) မဟုတ်ပါဘူး။ နိုင်ငံရေးအဖွဲ့အစည်း (institution) ဖြစ်ပါတယ်”ဟု ယာယီသမ္မတ ဒူဝါလရှီးလက ပြောသည်။
Public Service Announcement
လက်ရှိအချိန်အထိ ပြည်တွင်းရှိ ပြည်သူလူထုများသာမက နိုင်ငံတကာရှိ နိုင်ငံရေးအသိုင်းအဝိုင်းများကပါ စစ်ကောင်စီကို အသိအမှတ်မပြုဘဲ NUG အစိုးရကိုသာ အသိအမှတ်ပြုလာကြခြင်းသည် ပြည်ထောင်စုလွှတ်တော်ကိုယ်စားပြု ကော်မတီCRPH ၏ နိုင်ငံရေးသတ္တိရှိမှု၊ နိုင်ငံရေးပါးနပ်မှုနှင့် နိုင်ငံရေး ဦးဆောင်မှုကြောင့် ဖြစ်သည်ဟု ယာယီသမ္မတ ဂုဏ်ပြုသည်။
ထို့အပြင် ယခုကဲ့သို့ နိုင်ငံရေးအခက်အခဲများ ရင်ဆိုင်နေရသည့် ကြားကာလတွင် NUG အတွက် လိုအပ်သည့် ဥပဒေပြုရေးနှင့် NUG ၏ အခွင့်အာဏာ၊ လုပ်ဆောင်မှုများကို ကြီးကြပ်ထိန်းညှိပေးရန်သည်လည်း လွှတ်တော် ၏ အရေးကြီးသည့်တာဝန်ဖြစ်ကြောင်း ယာယီသမ္မတက ဆက်ပြော သည်။
အလားတူ အမျိုးသားညီညွတ်ရေးအတိုင်ပင်ခံကောင်စီ (NUCC)ဦးဆောင်သည့် အစုအဖွဲ့အစုံအလင်ဖြင့် အာဏာရှင်ကို အမြစ်ပြတ်ချေမှုန်းရေး၊ ဖက်ဒရယ်ဒီမိုကရေစီနိုင်ငံ တည်ဆောက်ရေးလမ်းစဉ်တွင်လည်း CRPH က ဦးဆောင်ဦးရွက်ပြုရဦးမည်ဖြစ်ကြောင်း ၎င်းက ဆိုသည်။
ယာယီသမ္မတ၏ မိန့်ခွန်းအဆုံးသတ်တွင် စစ်ကောင်စီကို အမြစ်ပြတ်ချေမှုန်းရန်၊ ဖက်ဒရယ်ဒီမိုကရေစီစနစ်ကို တည်ထောင်ရန်၊ စည်ပင်သာယာ၀ပြောသောတိုင်းပြည်ကို တိုင်းရင်းသားစည်းလုံးညီညွတ်မှုနှင့်အတူ တည်ထောင်ကြရန် တိုက်တွန်းနှိုးဆော်သည်။
