နိုင်ငံတကာရင်းနှီးမြှပ်နှံသူများနှင့် ပူးပေါင်းဆောင်ရွက်သည့် စီမံကိန်းများကို လတ်တလော အခြေအနေအရ ရပ်ဆိုင်းထားသည်ဟု အများပိုင်ကုမ္ပဏီတစ်ခုဖြစ်သော MAPCO ကုမ္ပဏီက ထုတ်ပြန်သည်။
၂၀၁၂ တွင်စတင်တည်ထောင်ခဲ့ပြီးဆန်ပြည်ပတင်ပို့မှု၊ ဓာတ်မြေသြဇာရောင်းချမှု၊ ဆန်စက်လုပ်ငန်း၊ တောင်သူများနှင့် ကန်ထရိုက်လယ်ယာလုပ်ငန်း၊ သဘာဝဓာတ်မြေသြဇာစမ်းသပ်လုပ်ငန်းစသည့်တို့ကို ဆက်လက်လုပ်ကိုင်နေသော်လည်း နိုင်ငံတကာရင်းနှီးမြှပ်နှံသူများနှင့်ပူးပေါင်းဆောင်ရွက်မည့် စီမံကိန်းများကိုမူ ရပ်ဆိုင်းထားသည်ဟု မြန်မာနိုင်ငံလယ်ယာစီးပွားရေး အများပိုင်ကုမ္ပဏီလီမိတက် (MAPCO)က ဖေဖော်ဝါရီ ၂ ရက်တွင် ထုတ်ပြန်သည်။
စစ်အုပ်စုက အာဏာသိမ်းပြီးနောက်ပိုင်း ပြည်ပရင်းနှီးမြုပ်နှံမှုများဝင်ရောက်မှု မရှိသလောက်နည်းပါးဖြစ်နေပြီး ပြည်ပကုမ္ပဏီများ ပြန်လည်ထွက်ခွာနေကြသည်။ထိုအချိန်တွင် MAPCO ကနိုင်ငံတကာနှင့်ပူးပေါင်းဆောင်ရွက်သောစီမံကိန်းများ ရပ်ဆိုင်းထားသည်ဟုကြေညာခြင်းဖြစ်သည်။
MAPCO သည် အရပ်သားအစိုးရလက်ထက်တွင် တရုတ်၊ စင်ကာပူ၊ ဂျပန်စသည့် နိုင်ငံများမှ ကုမ္ပဏီများ ပူးပေါင်း၍ စီမံကိန်းများကို လုပ်ကိုင်ခွင့်ရခဲ့သည်။ လှည်းကူးတွင် တည်ဆောက်မည့် ဒေါ်လာ သန်း ၂၃၀ တန် လှည်းကူးစက်မူဥယျာဉ်စီမံကိန်းတွင် City Mark ကုမ္ပဏီနှင့် MAPCO ပူးပေါင်း၍ စင်ကာပူ Sembcrop တည်ဆောက်ရန် လုပ်ကိုင်ခွင့်ရထားသည်။
ထိုပြင် သီလဝါအထူးစီးပွားရေးဇုန်တွင်လည်းဂျပန် ကုမ္ပဏီများဖြစ်သည့် Marubeni ၊ Sumitomo နှင့် Mitsui တို့နှင့်အတူ MAPCO က ဒေါ်လာ ၂ ဘီလီယံခွဲတန် LNG သုံးဓာတ်အားစက်ရုံစီမံကိန်းကိုလည်း လုပ်ကိုင်ခွင့်ရထားသည်။
တရုတ်အစိုးရပိုင် CITICကုမ္ပဏီနှင့်လည်းမြန်မာ-တရုတ် ဆန်စပါးစက်မှုလုပ်ငန်းစီမံကိန်း(MCRI)ကိုလည်း MAPCOကလုပ်ကိုင်ခွင့်ရထားသည်။
MAPCOသည် စစ်တပ်ပိုင် Mytel ကုမ္ပဏီတွင်လည်း ရှယ်ယာပါဝင်ခဲ့သော်လည်း ၂၀၂၁ ဇွန်လတွင် ထိုရှယ်ယာများကို ရောင်းချခဲ့သည်။ MAPCOသည် Mytelတွင် ပြည်တွင်းကုမ္ပဏီ ၁၁ ပါဝင်သည့် Myanmar National Telecom Holdingအဖြစ်ပါဝင်ခဲ့ခြင်းဖြစ်သည်။ MNTH ကုမ္ပဏီသည် Mytelတွင်ရှယ်ယာ ၂၃ ရာခိုင်နှုန်းကျော်ပါဝင်သည်။ ထိုကုမ္ပဏီတွင် MAPCOက ရှယ်ယာ တန်ဖိုး ကျပ် ၁ဘီလီယံကျော်တန်ဖိုးရှိသည့် အစုရှယ်ယာ တစ်သန်းကျော်ကို ပိုင်ဆိုင်ခဲ့ခြင်းဖြစ်သည်။