အကြမ်းဖက်စစ်ကောင်စီက အင်အား ၃၀၀ ခန့်ဖြင့် စစ်ကြောင်း ၄ခုခွဲပြီး CDF-KKG တပ်ရင်း-၄ စခန်းကို တိုက်ခိုက်ရန် စီစဉ်နေကြောင်း ချင်းပြည်ကာကွယ်ရေးတပ်-ကလေး-ကဘော်-ဂန့်ဂေါ (CDF-KKG)ကယမန့်(ဖေဖော်ဝါရီ-၇ ရက်)က သတင်းထုတ်ပြန်ထားသည်။
အကြမ်းဖက်စစ်ကောင်စီနှင့် ပျူစောထီးပူးပေါင်းတပ်ဖွဲ့က အင်အား ၅၀၀ကျော်ဖြင့် CDF-KKGတပ်ရင်း ၄ ၏ စခန်းကို သိမ်းပိုက်ရန် ဖေဖော်ဝါရီ ၆ ရက်ကတည်းက ထိုးစစ်နေဖြင်းဖြစ်သည်။သို့သော်စစ်ကောင်စီတပ်လာရလမ်းကြောင်းတလျှောက်တွင် မိုင်းများဖြင့် တားဆီးထားသဖြင့် ပြန်လည်ဆုတ်ခွာခဲ့သည်။ CDF-KKG တပ်ရင်း ၄ ကိုတိုက်ခိုက်ရန်အကြမ်းဖက်စစ်ကောင်တပ် ခြေမြန်တပ်ရင်း- ခလရ (၇၇) နှင့် ခလရ (၈၈)တို့က ဆောင်ရွက်နေခြင်းဖြစ်သည်ဟုလည်းဖော်ပြထားသည်။
စစ်ကောင်စီတပ်နှင့် CDF-KKGတို့ကြားတိုက်ပွဲများသည် CDF-KKG ၏ ရှေ့ပြေးစခန်းကို လာရောက်တိုက်ခိုက်သည့်ဖေဖော်ဝါရီ ၄ ရက်မှစတင်ပြီး ဖေဖော်ဝါရီ ၇ရက်အထိဖြစ်ပွားနေဆဲဖြစ်သည်။
ဖေဖော်ဝါရီ ၄ ရက်က စစ်ကောင်စီတပ်နှင့်ပျူစောထီးများပါဝင်သည့်အင်အား ၂၀၀ခန့်က ဟံသာဝတီရွာမှ မှန်တောရွာဘက်ကို ထိုးစစ်ဆင်ခဲ့သည်။ထိုကြောင့် CDF-KKGက မှန်တောရွာအထွက်တွင် တိုက်မိုင်းများဆင်ကာ ဆီးကြိုစောင့်ဆိုင်းခဲ့သည်။ ထို့နေ့ ညနေပိုင်းတွင်စစ်ကောင်စီဘက်မှ PDFစခန်းငယ်တခုကိုသိမ်းယူပြီး ထိုနေရာမှ လက်နက်ကြီး၊ လက်နက်ငယ်များဖြင့် ၄၅ မိနစ်ကြာ ပစ်ခတ်ခဲ့သည်။ထိုကြောင့် ရှေ့ပြေးစခန်းကို ယာယီလက်လွတ်ခဲ့ရပြီး ပစ္စည်းနှင့် လက်နက်အချို့စွန့်လွတ်ခဲ့ရသည်ဟုပါရှိသည်။
Public Service Announcement
သို့သော်လည်း CDF-KKG ကဖေဖော်ဝါရီ ၄ ရက်နေ့ ညနေ ၆နာရီမှ ဖေဖော်ဝါရီ ၅ ရက် မနက် ၃ နာရီအထိ ရှေ့ပြေးစခန်းကို ပြန်လည်ရယူရန်တိုက်ခိုက်ခဲ့ပြီး CDF(ဟားခါး)က တပ်မမှူးဦးစီးသည့် ပြည်သူ့ကာကွယ်ရေးတပ်ဖွဲ့ ၁၈ ဦးက လာရောက်ကူညီသဖြင့် စခန်းကို ပြန်လည်ထိန်းချုပ်နိုင်ခဲ့သည်ဟုဆိုသည်။
ရှေ့ပြေးစခန်းကိုထိန်းသိမ်းပြီး ၃နာရီအကြာတွင် အကြမ်းဖက်စစ်ကောင်စီအင်အား ၂၅၀ခန့်ကလက်နက်ကြီး၊လက်နက်ငယ်များဖြင့် ပတ်ခတ်လာသဖြင့်စခန်းကလက်လွတ်ခဲ့ရပြန်သည်ဟုလည်း ထုတ်ပြန်ချက်တွင်ပါရှိသည်။ ထိုအပြင် စစ်ကောင်စီတပ်က CDF-KKG ၏ တပ်ရင်း (၄)ကို လာရောက်တိုက်ခိုက်ရန်အင်အားအများအပြားဖြင့် ကြိုးစားနေပြီးစစ်ရေးတင်းမာနေခြင်းဖြစ်သည်။
ထို့အပြင်အခြားသတင်းတစ်ရပ်မှာ ကလေးမြို့သို့ ဦးတည်လာသည့် အကြမ်းဖက်စစ်ကောင်စီယာဉ်တန်းကို ဒေသခံကာကွယ်ရေးတပ်ဖွဲ့ ၅ခုကဖေဖော်ဝါရီ၇ရက် မိုင်းခွဲတိုက်ခိုက်သဖြင့် စစ်ကောင်စီတပ်သား ၉ ဦးသေဆုံးပြီး ဒေသခံကာကွယ်ရေးတပ်ဖွဲ့ဝင်တစ်ဦးကျဆုံးခဲ့ကြောင်းလည်းCDF-KKG ကသတင်းထုတ်ပြန်သည်။
ကား ၈စီးပါဝင်သည့် အကြမ်းဖက်စစ်ကောင်စီယာဉ်တန်းကို ရန်ကြီးအောင်ကျေးရွာမှ ကလေးမြို့သို့ ဦးတည်လာနေစဉ် ဒေသခံကာကွယ်ရေးတပ်ဖွဲ့ ၅ဖွဲ့က မိုင်းခွဲတိုက်ခိုက်ခဲ့ခြင်းဖြစ်ပြီး ပြည်သူ့ကာကွယ်ရေးတပ်ဖွဲ့ဝင် ၅ ဦးလည်း လက်နက်ကြီးထိမှန်၍ ဒဏ်ရာ(မစိုးရိမ်ရ) ရရှိခဲ့သည်ဟု ပါရှိသည်။ CDF-KKG ၊ PDF(ကလေး) ၊ဖလမ်းအခြေစိုက် ချင်းပြည်ကာကွယ်ရေးတပ်-CNDF ၊ ရိန်းဂျားကလေးပြည်သူ့ကာကွယ်ရေးတပ်-RKDF နှင့် ကလေးမြို့ ပြည်သူ့ကာကွယ်ရေးတပ်ဖွဲ့(ပကဖ)တို့က ပူးပေါင်းတိုက်ခိုက်ခဲ့ခြင်းဖြစ်သည်။
