ဖယ်ခုံမြို့နယ်ပြည်သူ့အုပ်ချုပ်ရေးအဖွဲ့(ပအဖ)က ဖေဖော်ဝါရီ ၃ရက်တွင် စာထုတ်ပြန်၍ ဖယ်ခုံမြို့နယ်အတွင်းရှိ ဈေးဆိုင်များအနေဖြင့် စစ်ကောင်စီ၏ အကျိုးစီးပွားဖြစ်သော တချို့ထုတ်ကုန်များကို ဖေဖော်ဝါရီ ၂၈ရက်မှ ထပ်မံတင်သွင်း ရောင်းချခြင်းမပြုရန် တားမြစ်စာထုတ်ပြန်ခဲ့မှုအပေါ် ကွင်းဆင်းအသိ ပေးခြင်းဖြစ်သည်ဟုဆိုသည်။
ထုတ်ပြန်ချက်အတိုင်း ပြည်သူများအခက်ခဲမရှိဘဲလိုက်နာနိုင်ရန်အတွက် ပအဖနှင့် ဖယ်ခုံ PDF တပ်ခွဲ(၁)၊(၂)နှင့် (၃)တို့ ပူးပေါင်း၍ စစ်ကောင်စီထုတ်ကုန်များကို ရောင်းချခြင်းမပြုရန်နှင့် ပြည်သူများအားလုံး ပူးပေါင်းပါဝင်ပေးကြရန် ကြိုတင်ကွင်းဆင်း အသိပေးခဲ့ရာ ကြိုတင်ကွင်းဆင်းအစီစဉ်တွင် အခက်ခဲတစ်စုံတရာမရှိဘဲ ပြည်သူများက ပူးပေါင်းပါဝင်လိုကြသည်ကို တွေ့ရသည်ဟု ထုတ်ပြန်သည်။
စစ်ကောင်စီထုတ်ကုန်များ ရောင်းဝယ်သယ်ယူခြင်းမပြုရန် ဒေသအသီးသီးရှိ ကာကွယ်ရေးတပ်များနှင့် တိုင်းရင်းသား လက်နက်ကိုင်တပ်ဖွဲ့အချို့က တားမြစ်ထားသည်။ ထို့ပြင် စစ်ကောင်စီဝင်ငွေ ထောက်တိုင်များအားလုံးကို သပိတ်မှောက် ဆန့်ကျင်ရာ၌ ပြည်သူလူထုအားလုံးပါဝင်ကြရန်လည်း တိုက်တွန်းထားသည်။
