အမျိုးသားညီညွတ်ရေးအစိုးရ(NUG)သည် အပြည်ပြည်ဆိုင်ရာတရားရုံး(ICJ)၌ စွဲဆိုထားသော ဂမ်ဘီယာ- မြန်မာအမှုအတွက် နိုင်ငံတကာဥပဒေပညာရှင်နှစ်ဦးပါဝင်သော ဥပဒေပညာရှင်အဖွဲ့ကို ယနေ့(ဖေဖော်ဝါရီ ၁၅ ရက်)ထုတ်ပြန်ကြေညာသည်။
မြန်မာနိုင်ငံက ICJ တွင် ရင်ဆိုင်နေရသော ဂမ်ဘီယာ- မြန်မာအမှုနှင့် စပ်လျဉ်း၍ ကုလသမဂ္ဂဆိုင်ရာ မြန်မာသံအမတ်ကြီး ဦးကျော်မိုးထွန်းကို မြန်မာနိုင်ငံ၏တစ်ဦးတည်းသော ကိုယ်စားလှယ်အဖြစ် ခန့်အပ်ထားပြီး ယင်းအမှုအတွက် ပါမောက္ခမစ္စတာဂျွန်မာ့စ်သူဗီနင်နှင့် မစ္စတာ စတီဗင်ပေါလက်စ်တို့ပါဝင်သော ဥပဒေပညာရှင်အဖွဲ့ကို ကြေညာလိုက်ခြင်းဖြစ်သည်။
NUG သည် အထက်ပါဥပဒေရေးရာအဖွဲ့နှင့် နီးကပ်စွာ ပူးပေါင်းဆောင်ရွက်၍ ICJတွင် ရင်ဆိုင်လျက်ရှိသည့် အမှုကို ဖြေရှင်းဆောင်ရွက်သွားမည်ဖြစ်ပြီး NUGသည် စစ်တပ်၏ လူ့အခွင့်အရေးချိုးဖောက်နေသည့် အထောက်အထားများကို ဆက်လက်ရှာဖွေစုဆောင်းပြီး တင်ပြသွားမည်ဖြစ်ကြောင်း ယာယီသမ္မတဒူဝါလရှီးလက ပြောသည်။
ထို့အပြင် ICC ၏ စီရင်ပိုင်ခွင့်အာဏာကို ၂၀၀၂ နောက်ပိုင်းကျူးလွန်သော Rome Statute တွင် အကျုံးဝင်သည့် ရာဇ၀တ်မှုအားလုံးအတွက် အပ်နှင်းပေးထားပြီး မြန်မာနိုင်ငံနှင့် ပြည်သူများ၏ ကောင်းကျိုးကို ရည်မျှော်၍ လူ့အခွင့်အရေးနှင့် တရားမျှတမှုကို အလေးထားသူအားလုံး၏ ပံ့ပိုးကူညီမှုအားလုံးကို ရယူကာ လက်တွဲကြိုးပမ်းဆောင်ရွက်မည်ဖြစ်ကြောင်း NUG ထုတ်ပြန် သည်။
Public Service Announcement
NUG သည် ICJ အမှုကို ချောမွေ့စွာဆက်လက်ဆောင်ရွက်နိုင်ရန် ပဏာမကန့်ကွက်မှုများကို ရုပ်သိမ်းကြောင်းဆုံးဖြတ်ချက်ကို ရုံးတော်အားအကြောင်းကြားထားသည်။
