▪️တိုက်ပွဲဆက်ပြင်းထန်နိုင်၍ ပြည်သူများလုံခြုံရာပြောင်းရွေ့ရန်နှင့် ရပ်ဝေးပြည်သူများဖြတ်သန်းသွားလာခြင်းမပြုရန် တိုက်တွန်း
ရှမ်းပြည်နယ်တောင်ပိုင်း ဖယ်ခုံမြို့နယ် မိုးဗြဲမြို့၌ ယနေ့ တိုက်ပွဲဖြစ်ပွားခဲ့ရာ စစ်ကောင်စီတပ်မှ သေဆုံးထိခိုက်မှုရှိခဲ့ကြောင်း မိုးဗြဲပြည်သူ့ကာကွယ်ရေတပ်(MBPDF)က ထုတ်ပြန်သည်။
ယမန်နေ့ (ဖေဖော်ဝါရီ၁၅) နံနက်ပိုင်းတွင် မိုးဗြဲမြို့သို့ တင့်ကားအပါအဝင် အင်အားအလုံးအရင်းဖြင့် ထိုးစစ်ဆင်လာသော အကြမ်းဖက်စစ်တပ်ကို မိုးဗြဲ PDF၊ လွိုင်ကော် PDF၊ ဒီးမော့ဆို PDF၊ KNDF BO-3၊ KGZ အဖွဲ့တို့ပူးပေါင်းပြီး စောင့်ကြိုတိုက်ခိုက်ခဲ့သည်ဟု ဆိုသည်။
ထို့ပြင် စစ်ကောင်စီတပ် ကင်းပုန်းဝပ်သည့် နေရာများကို ဝင်ရောက်ပစ်ခတ်ခဲ့ရာ ညနေ ၄နာရီခန့်အထိ တိုက်ပွဲပြင်းထန်ခဲ့သည်ဟု ဖော်ပြထားသည်။
Public Service Announcement
ထိတွေ့မှုအချိန်အတွင်း အကြမ်းဖက်စစ်တပ်ဘက်မှ ထိခိုက်ကျဆုံးမှုရှိပြီး အရေအတွက်ကို အတိအကျမသိရကြောင်း၊ ညအချိန်ထိ စစ်ကောင်စီတပ်က လက်နက်ကြီးများ ပစ်ခတ်နေကြောင်း ထုတ်ပြန်သည်။
ယနေ့ တိုက်ပွဲတွင် ပြည်သူတပ်သားများဘက်မှ ရဲဘော် နှစ်ဦး အသေးစားဒဏ်ရာ ရရှိခဲ့ကြောင်း၊ အကြမ်းဖက်စစ်တပ် ပစ်ခတ်လိုက်သော လက်နက်ကြီးကြောင့် မိုးဗြဲမြို့၊ စည်းကား(၃)ရပ်ကွက်ရှိ ပြည်သူ့နေအိမ်တစ်လုံး မီးလောင်ပျက်စီးခဲ့ကြောင်း ဖော်ပြထားသည်။
အကြမ်းဖက်စစ်တပ်သည် မိုးဗြဲနယ် နေရာအတော်များများတွင် တပ်စွဲလျက်ရှိပြီး လာမည့်ရက်များတွင် အပြင်းအထန် ထိုးစစ်ဆင်လာနိုင်သောကြောင့် တိုက်ပွဲ ပြင်းထန်နိုင်ကြောင်း၊ထို့ကြောင့် မိုးဗြဲမြို့ပေါ်ရှိ ပြည်သူများလုံခြုံဘေးကင်းသည့် နေရာများသို့ အမြန်ဆုံးပြောင်းရွေ့နေထိုင်ကြပါရန် တိုက်တွန်းကြောင်း မိုးဗြဲ PDFက ထုတ်ပြန်သည်။
ထို့အပြင် ရပ်ဝေးမှ ပြည်သူများအနေဖြင့် မိုးဗြဲနှင့်ထိစပ်နေသော လမ်းများကို သွားလာခြင်းမပြုရန် အသိပေးထားပြီး မိုးဗြဲ PDFကို ထောက်ပံ့ဝန်းရံပေးရန် တောင်းဆိုထားသည်။
