စစ်ကိုင်းတိုင်း မြောင်မြို့နယ်တွင် အကြမ်းဖက်စစ်ကောင်စီတပ်ဖွဲ့ဝင် အချင်းချင်းမှားယွင်းပစ်ခတ်မိ၍ အကြမ်းဖက်စစ်သားသုံးဦး သေဆုံးနိုင်ကြောင်း မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ- CDSOMက ပြောသည်။
ယမန်နေ့ (ဖေဖော်ဝါရီ ၁၆ ရက်) ညနေ ၄နာရီခန့်က မန္တလေးတိုင်း မြင်းခြံမြို့နယ် ဆီမီးခုံဆိပ်ကမ်းမြို့မှ စက်လှေ ၂စီး အင်အား၂၀ခန့်ဖြင့် မြောင်မြို့နယ် နေပူကုန်းရွာသို့ ဝင်လာကြောင်း၊ ထို အကြမ်းဖက်စစ်ကောင်စီအဖွဲ့ထဲတွင် အရပ်ဝတ်ဖြင့် စစ်သား လေးဦးပါလာပြီး ရွာထဲတွင် ဝင်ရောက်မွှေနှောက်ပြီးနောက် ပြန်ထွက်လာသော အရပ်ဝတ်ဖြင့် စစ်သားလေးဦးအား အပြင်မှ စောင့်နေသော အကြမ်းဖက်စစ်ကောင်စီတပ်မှ ပြည်သူထင်၍ အချင်းချင်းမှားယွင်းပစ်ခတ်မှုဖြစ်ပွားခဲ့ခြင်းဖြစ် ကြောင်း၊ အရပ်ဝတ်အကြမ်းဖက်စစ်သားလေးဦးအနက်သုံးဦးအား ထမ်းထုတ်သွားရကြောင်း CDSOM က သတင်းထုတ်ပြန်သည်။
“သူတို့က မြစ်တစ်ဖက်ကမ်းမှာ တပ်စွဲထားတာ (ဆီမီးခုံ) အဲ့တာ မြစ်အနောက်ဘက်ကမ်းကို လာပြီးရွာထဲ ဝင်မွှေတာ။ သေနိုင်တယ်လို့တော့ သိရတယ်။ သူတို့က ပြည်သူ့ကာကွယ်ရေးအဖွဲ့ထင်ပြီး သူတို့ဘာသာစိတ်ခြောက်ခြားပြီးပစ်တာ”ဟု မြောင်မြို့နယ်ပြည်သူ့ကာကွယ်ရေးနှင့်လုံခြုံရေးအဖွဲ-CDSOM ၏ တာဝန်ရှိသူက လူထုနွေဦးသို့ ပြောသည်။
ထိုအပြင် ယမန်နေ့က အကြမ်းဖက်စစ်ကောင်စီတပ်၏ ဂျက်တိုက်လေယာဥ်တစ်စီး စစ်ကိုင်းမြို့နယ် ရေမျက်ကြီးအင်းအတွင်း ပျက်ကျခဲ့ရာ လေယာဥ်မှူးတစ်ဦး သေဆုံးခဲ့သေးသည်။
Public Service Announcement
