ရန်ကုန်မြို့ မြောက်ဒဂုံမြို့နယ် ထားဝယ်ချောင်ရဲစခန်း ဗုံးပစ်ပြီး စစ်ကူလာသည့်ကားပါ တိုက်ခိုက်ခဲ့၍ စစ်ကောင်စီတပ်သား ၁၀ဦးခန့် သေဆုံးနိုင်ကြောင်း Spring Brothers Forceအဖွဲ့က ယနေ့(ဖေဖော်ဝါရီ ၂၀)တွင် ထုတ်ပြန်သည်။
အဆိုပါစစ်ဆင်ရေးကို People’s Force (Yangon) အဖွဲ့နှင့် Spring Brothers Force အဖွဲ့တို့ပူးပေါင်း လုပ်ဆောင်ခဲ့ခြင်းဖြစ်ပြီး ယမန်နေ့(ဖေဖော်ဝါရီ ၁၉ ရက်) ည ၇နာရီခန့်တွင် ၄၀(မမ)နှစ်လုံးဖြင့် စတင်တိုက်ခိုက်ခဲ့သည်ဟု ဆိုသည်။
ထို့နောက် စစ်ကူရောက်ရှိလာသော စစ်ကောင်စီကားတန်းကို ၄၀(မမ)တစ်လုံး အဝေးထိန်းဗုံးလေးလုံးဖြင့် ထပ်မံတိုက်ခိုက်ခဲ့ကာ ကားတစ်စီးပျက်စီး၍ စစ်ကောင်စီတပ်သား ၁၀ဦးခန့် ကျနိုင်သည်ဟု စစ်ဆင်ရေးဖော်ဆောင်ခဲ့သည့် အဖွဲ့များက ခန့်မှန်းသည်။
သို့သော် အခြေအနေအကြောင်းအရင်းအမျိုးမျိုးကြောင့် အဝေးထိန်းတစ်လုံးသာ ပေါက်ကွဲခဲ့သည်ဟု ဆိုသည်။
ပေါက်ကွဲမှုနှင့်ပစ်ခတ်မှုဖြစ်စဉ်များ ဖြစ်ပွားပြီးနောက် အကြမ်းဖက်စစ်ကောင်စီတပ်မှ လိုက်လံပစ်ခတ်ခဲ့မှုအချို့ရှိခဲ့ပြီး စစ်ဆင်ရေးအဖွဲ့များအောင်မြင်စွာ ဆုတ်ခွာနိုင်ခဲ့ကြောင်းလည်း အသိပေးသည်။
ထို့အပြင် ယမန်နေ့ညက သဃ်န်းကျွန်း၊တောင်ဥက္ကလာ၊သာကေတ၊တောင်ဒဂုံ၊ မြောက်ဒဂုံ ၊ အရှေ့ဒဂုံနှင့် လှိုင်သာယာတို့တွင် ပေါက်ကွဲမှုနှင့် သေနတ်သံများထွက်ပေါ်ခဲ့သည်။
ဖေဖော်ဝါရီ ၁၉ ရက် ည ၉နာရီခန့်က လှိုင်သာယာ မြို့ နယ်တွင် ပေါက်ကွဲမှုမှာ အမှတ်(၅)ရပ်ကွက်ရှိ အုပ်ချုပ်ရေးမှူးရုံးအား ပစ်မှတ်ထားတိုက်ခိုက်မှုဖြစ်ကြောင်း ဒေသခံများက ဆိုသည်။