စစ်ကိုင်းတိုင်း မြင်းမူမြို့နယ်တွင် အကြမ်းဖက်စစ်ကောင်စီတပ်မှ PDF အယောင်ဆောင်ကာ စစ်ရေးလှုပ်ရှားမှုများ ပြုလုပ်နေကြောင်း မြင်းမူမြို့နယ်ပြည်သူ့ကာကွယ်ရေးတပ်ဖွဲ့က သတိပေးသည်။
ယခုအခါတွင် အကြမ်းဖက်စစ်ကောင်စီတပ်များသည် မြင်းမူမြို့နယ်အတွင်း စစ်ဆင်ရေးများပြုလုပ်နေပြီဖြစ်ကြောင်း၊ အကြမ်းဖက်စစ်ကောင်စီတပ်ဖွဲ့ဝင်များသည် မိမိတို့ MMUPDF နှင့် Black Eagle တံဆိပ်ပါ အင်္ကျီများဝတ်၍ PDF အယောင်ဆောင်ကာ စစ်ရေးလှုပ်ရှားမှုများ ပြုလုပ်နေပါသဖြင့် ပြည်သူများအနေဖြင့် MMUPDF နှင့် Black Eagleတံဆိပ်ပါ အင်္ကျီဝတ်ဆင်သူများအား လုံးဝမယုံကြည်ကြပါရန်နှင့် တွေ့ရှိပါက ဆက်သွယ်အကြောင်းကြားပေးကြပါရန် မြင်းမူမြို့နယ်ပြည်သူ့ကာကွယ်ရေးတပ်ဖွဲ့က မေတ္တာရပ်ခံသည်။
ယနေ့(ဖေဖော်ဝါရီ ၂၃) နံနက်၁၀နာရီခန့်က အကြမ်းဖက်စစ်ကောင်စီတပ်များသည် MMU-PDF တံဆိပ်ပါ အင်္ကျီများဖြင့် အလ္လကပ္ပကျေးရွာ သံလမ်းမှ မြောက်သို့ ခြေလျင်ဆင်းသွားကြောင်း၊ PDF အယောင်ဆောင်များအား လက်နက်များကိုင်ဆောင်ထားနိုင်ခြင်း၊ ဝတ်စုံအပြည့်များ ဝတ်ဆင်ထားခြင်း ရှိ၊မရှိ ကြည့်ခြင်းဖြင့် ခွဲခြားနိုင်မည်ဟု မြင်းမူမြို့နယ်သတင်းမှန်ပြန်ကြားရေးက အသိပေးသည်။
စစ်ကိုင်းတိုင်း မုံရွာနှင့် ချင်းတွင်းအထက်ပိုင်းဒေသများနှင့် မကွေးတိုင်းသို့သွားသည့် အကြမ်းဖက်စစ်ကောင်စီတပ်များသည် စစ်ကိုင်းတိုင်း၊ မြင်းမူမြို့နယ်သို့ ဖြတ်သန်းသွားရလေ့ရှိပြီး မကြာခဏလည်း တိုက်ခိုက်ခံနေရသည်။
Public Service Announcement
