စစ်ကိုင်းတိုင်း ကန့်ဘလူ -တန့်ဆည်မြို့နယ်အစပ် ကင်းတပ်ဆည်အနီးတွင် အကြမ်းဖက်စစ်ကောင်စီတပ်ကို မိုင်းဆွဲတိုက်ခိုက်ရာ ထိခိုက်သေဆုံးမှုများနိုင်ကြောင်း Taze Revolution Force – TRFက ထုတ်ပြန်သည်။
ယနေ့(ဖေဖော်ဝါရီ ၂၃) နေ့လယ်၂ နာရီခန့်က အင်အား ၁၀၀ကျော်ပါ အကြမ်းဖက်စစ်ကောင်စီ၏ ခြေလျင်စစ်ကြောင်းကို မိုင်းဆွဲတိုက်ခိုက်ခဲ့ခြင်း ဖြစ်သည်ဟု TRFက ဆိုသည်။
“ကန့်ဘလူ -တန့်ဆည်နယ်စပ် ကင်းတပ်ဆည်အနီး ရောက်နေသော စစ်ခွေးများကို TRFမှ မိုင်းဆွဲတိုက်ခိုက်ရာ မိုင်းကွင်းအလယ် လာရောက်နေသော မအလကျွန်များအကျအဆုံးများနိုင်သည်ဟု သိရှိရပြီး စခများမှ လက်နက်ကြီးများဖြင့် ရမ်းထုနေကြောင်း သိရပါတယ်”ဟု TRFက အသိပေးသည်။
မိုင်းဆွဲခံရပြီး အထိနာခဲ့သော အကြမ်းဖက် စစ်ကောင်စီ စစ်ကြောင်းသည် ၎င်းတို့ တိုက်ခိုက်ခံရသော နေရာဝန်းကျင်အား လက်နက်ကြီးများ အသုံးပြုနေသောကြောင့် ဒေသခံများထွက်ပြေး နေရသည်ဟုလည်း သိရသည်။
အဆိုပါ စစ်ကောင်စီစစ်ကြောင်းသည် ယနေ့ နံနက် ၁၁နာရီခန့်တွင် ကန့်ဘလူမြို့နယ်၊ မှော်တော်ရွာမှ ထွက်ခွာလာပြီး တန့်ဆည်မြို့နယ်ဘက်သို့ ဦးတည်လာခဲ့ခြင်း ဖြစ်သည်။