▪️နတ်တောင်နဂါးတပ်မှ ရဲဘော်တစ်ဦးကျဆုံး
စစ်ကိုင်းတိုင်း ရွှေဘိုမြို့နယ် ငါးပိအိုးရွာအား မီးရှို့ပြီးနောက် ဂွေးကုန်းကျေးရွာဘက်သို့ စစ်ကြောင်းထိုးလာသော အကြမ်းဖက်စစ်ကောင်စီနှင့် ပျူစောထီး ပူးပေါင်းအဖွဲ့ကို မိုင်းဆွဲတိုက်ခိုက်ရာ အနည်းဆုံး ၃၅ဦးသေဆုံးနိုင်ကြောင်း နတ်တောင်နဂါး ပြည်သူ့ကာကွယ်ရေးတပ်ဖွဲ့က ထုတ်ပြန်သည်။
ယနေ့(ဖေဖော်ဝါရီ ၂၅ ရက်) နံနက် ၁၁နာရီခန့်က နတ်တောင်နဂါးပြည်သူ့ကာကွယ်ရေးတပ်ဖွဲ့နှင့် GHOST RIDER Special Task Force (mdy) နှစ်ဖွဲ့ပူးပေါင်း၍ ရှေ့ထွက်မိုင်း ၉လုံးဖြင့် မိုင်းဆွဲတိုက်ခိုက်သည်ဟု ဆိုသည်။
“စခနှင့်ပျူ ၃၅ယောက်နှင့် အထက်သေဆုံးနိုင်ပြီး စခ ကားတစီးလဲမိုင်းစာမိ၍ မီးလောင်ပျက်စီးသွားခဲ့ပါသည်”ဟု နတ်တောင်နဂါးပြည်သူ့ကာကွယ်ရေးတပ်ဖွဲ့က ပြောသည်။
Public Service Announcement
အကြမ်းဖက်စစ်ကောင်စီ၏ စစ်ကြောင်းမှ ကျန်ရှိသော စစ်ကောင်စီတပ်သားနှင့် ပျူစောထီးများက လက်နက်ကြီးများဖြင့် ပြန်လည်ပြစ်ခတ်သောကြောင့် ပူးပေါင်းအဖွဲ့မျာ ပြန်လည်ဆုတ်ခွာခဲ့သည်ဟုဆိုသည်။
သို့သော် လမ်းခုလပ်တွင် အဖွဲ့ကွဲသွား၍ နတ်တောင်နဂါးပြည်သူ့ကာကွယ်ရေးတပ်ဖွဲ့ မှ ရဲဘော်တစ်ဦး သည် စစ်ကောင်စီ၏ ကင်းပုန်းနှင့်ထိပ်တိုက်တွေ့ဆုံခဲ့ပြီး ရန်သူလက်ထဲ ကျရောက်သွားခဲ့ရသည်ဟု အသိပေးထား သည်။
ဖမ်းခံခဲ့ရသည့် ရဲဘော်၌ သေနတ်အတိုတစ်လက် ပါရှိခဲ့သော်လည်း လက်နက်အင်အား၊ လူအင်အားမမျှသဖြင့် အကြမ်းဖက်စစ်ကောင်စီ လက်ထဲတွင် လက်နက်နှင့်အတူ အသက်ပါပေး၍ တိုက်ပွဲတွင် ကျဆုံးခဲ့ရကြောင်း အသိပေးသည်။
တိုင်းပြည်အတွက်အသက်ပေး၍ စစ်အာဏာရှင်စနစ်လွတ်မြောက်ရေးတိုက်ပွဲတွင် ကျဆုံးခဲ့ရသော ရဲဘော်မာယာအား အလေးနီပြုကြောင်း နှင့်ကျန်ရစ်သူ မိသားစုနှင့် ထပ်တူထပ်မျှ ဝမ်းနည်းခံစားရသည်ဟု ထုတ်ပြန်ချက်၌ ဖော်ပြသည်။
ရွှေဘိုမြို့နယ်တွင် အကြမ်းဖက်စစ်ကောင်စီတပ်က ပျူစောထီးများနှင့် ပူးပေါင်းကာ ကျေးရွာများကို သာလွန်အင်အားဖြင့် စစ်ကြောင်းထိုးနေပြီး ယနေ့နံနက် အစောပိုင်းက နှမစားရစ်ကျေးရွာတွင် ဒေသခံပြည်သူများနှင့် ပြည်သူ့ကာကွယ်ရေးအဖွဲ့ဝင် စုစုပေါင်း ၁၅ ဦးခန့် ကျဆုံးခဲ့ရသည်။
