ဖားကန့်ရှိ KIAတပ်နေရာကို စစ်ကောင်စီ လေကြောင်းမှ ဗုံးကြဲတိုက်ခိုက်

ကချင်ပြည်နယ် ဖားကန့်မြို့နယ်ရှိ ကချင်လွတ်လပ်ရေးတပ်မတော်(KIA) တပ်စခန်းရှိရာနေရာသို့ အာဏာသိမ်းစစ်ကောင်စီတပ်က ယမန်နေ့ညပိုင်းတွင် တိုက်လေယာဉ်ဖြင့် ဗုံးကြဲတိုက်ခိုက်လာကြောင်း ကချင်ဒေသခံက ပြောသည်။

KIAတပ်မဟာ(၂)၊ တပ်ရင်း (၁၄)နယ်မြေသို့ ဖေဖော်ဝါရီ ၂၆ရက် နံနက် ၂နာရီခွဲအချိန်တွင် စစ်ကောင်စီက လေကြောင်းဖြင့် တိုက်ခိုက်လာသည်ဟု ဆိုသည်။

“အထိအခိုက်တော့ မရှိဘူး။ နည်းနည်းကြားမှာ ကျသွားတယ်။ ကြဲတာက တစ်ခါတည်းလာကြဲတာ။ အခုက စစ်ကာလဆိုတော့ အဓိက သတိထားပြီးနေရမှာပေါ့။ KIA စစ်တပ်ပဲ ဖြစ်ဖြစ် ရွာသားတွေပဲဖြစ်ဖြစ် အမြဲတမ်း သတိနဲ့ နေရမယ့်အနေအထားရောက်နေတာပေါ့” ဟု ကချင်ဒေသခံက ပြောသည်။

ယနေ့ နေ့လယ်ပိုင်းတွင်လည်း ဖားကန့်လမ်းတွင် ပစ်ခတ်သံများကြားနေရပြီး ဖြစ်စဉ် အသေးစိတ်ကို မသိရသေးဟု ၎င်းက ဆိုသည်။

Public Service Announcement

“အခုလည်း ဗုံးသံတွေကြားနေရတယ်။ ဖားကန့်လမ်းဘက်မှာ။ အခု စကားပြောနေရင်းတောင် လက်နက်ကြီးနဲ့လမ်းထုနေတာ။ ဘယ်ကနေ ဘယ်ကိုပစ်တာလည်းတော့ မသိရသေးဘူး”ဟု ကချင်ဒေသခံက ယနေ့ နေ့လယ် ၁နာရီခွဲခန့်တွင် ပြောသည်။

ယခုလအတွင်း ဖားကန့်၊ ပူတာအိုဒေသများ၌ KIAနှင့် စစ်ကောင်စီတပ်တို့ တိုက်ပွဲဖြစ်ပွားမှုများ ရှိခဲ့သည်။ ပြီးခဲ့သည့် ရက်ပိုင်းကလည်း ဖားကန့် ကာမိုင်းရှိ စစ်ကောင်စီဂိတ်ကို KIAနှင့် ပြည်သူ့ကာကွယ်ရေးတပ်(PDF) ပူးပေါင်းတိုက်ခိုက်ခဲ့၍ တိုက်ပွဲဖြစ်ခဲ့သည်။