အကြမ်းဖက်စစ်အုပ်စုသည် ပြည်သူလူထုပိုင်အိုးအိမ်များအား မတရားချိတ်ပိတ်သိမ်းဆည်းနေမှုမှာ သူရဲဘောကြောင်စွာ ညစ်ထေးသောနည်းလမ်းဖြင့် စနစ်တကျ ဖိနှိပ်လာသော လုပ်ရပ်များဖြစ်သောကြောင့် ပြင်းထန်စွာရှုတ်ချကြောင်း အမျိုးသားညီညွတ်ရေးအစိုးရ(NUG)က ယနေ့(ဖေဖော်ဝါရီ ၂၇ ရက်) ထုတ်ပြန် သည်။
ထို့အတူ နေအိမ်ချိတ်ပိတ်သိမ်းဆည်းခံရမှုများ အားလုံးမှာလည်း ကျူးလွန်ခံရသည့် ပြည်သူတစ်ဦးတစ်ယောက်ချင်းဆီတိုင်းအပေါ် သက်ရောက်မှုမရှိစေရဘဲ ပြည်သူ့လက်ရောက် ပြန်လည်ပေးအပ်နိုင်ရေးကို အမျိုးသားညီညွတ်ရေးအစိုးရအနေဖြင့် ဦးစားပေးစီမံဆောင်ရွက်သွားမည်ဟု ဖော်ပြသည်။
လတ်တလောကာလများအတွင်း အကြမ်းဖက်စစ်အုပ်စုအနေဖြင့် ၎င်းတို့၏ မတရားအာဏာလုယူမှုကို ဆန့်ကျင်သော၊ မိမိတို့၏ လွတ်လပ်စွာရေးသားထုတ်ဖော်ပြောဆိုခွင့်ကို ကျင့်သုံးလျက်ရှိသော ပြည်သူလူထု၏ ပုဂ္ဂိုလ်ရေးဆိုင်ရာ အချက်အလက်များကို Telegram ကဲ့သို့သော လူမှုကွန်ရက်များတွင် ရေးသားဖော်ထုတ်၍ အကြမ်းဖက်ရန်လှုံ့ဆော်မှုများ ပျံ့နှံ့လာခဲ့သည်ဟု NUG က ဆိုသည်။
လှုံ့ဆော်မှုများနှင့် ချိတ်ဆက်၍ ပြည်သူလူထုပိုင်ဆိုင်သော အိုးအိမ်စည်းစိမ်များကို မတရားသဖြင့် ချိတ်ပိတ် သိမ်းဆည်းမှုများ နေ့စဉ်ရက်ဆက် ပြုလုပ်လာသည်ကို တွေ့ရသည်ဟု အသိပေးသည်။
Public Service Announcement
အဆိုပါ ဆောင်ရွက်နေမှုများသည် တရားဥပဒေနှင့် ညီညွတ်မှုမရှိသည့်အပြင် စစ်အာဏာရှင် စနစ်ကို ဆန့်ကျင်သည့် ပြည်သူလူထုအပေါ် သူရဲဘောကြောင်စွာ ညစ်ထေးသောနည်းလမ်းဖြင့် စနစ်တကျ ဖိနှိပ်လာသော လုပ်ရပ်များဖြစ်သောကြောင့် ပြင်းထန်စွာရှုတ်ချကြောင်း ဖော်ပြသည်။
ထိုကဲ့သို့ ဥပဒေနှင့်ညီညွတ်ခြင်းမရှိသည့် မတရားဆောင်ရွက်မှုများတွင် ပူးပေါင်းပါဝင်ဆောင်ရွက်ကြသူ လူပုဂ္ဂိုလ်တစ်ဦးချင်း တစ်ယောက်ချင်းစီတိုင်းသည် မိမိ၏ပါဝင်ပတ်သက်မှု အတိုင်းအတာပေါ်မူတည်၍ တာဝန်ယူ၊ တာဝန်ခံရစေရေး ဆောင်ရွက်သွားမည်ဟု NUG က ကတိပြုသည်။
ကျူးလွန်ခံရသော ပြည်သူများအနေဖြင့် ကျူးလွန်မှုတွင်ပူးပေါင်းပါဝင်ပတ်သက်သူများ၏ အချက်အလက်များနှင့် မတရားချိတ်ပိတ် သိမ်းဆည်းခံရသည့် အိုးအိမ်ပိုင်ဆိုင်မှုစာရင်းများကို သက်သေများနှင့်တကွ အမျိုးသားညီညွတ်ရေးအစိုးရ ပြည်ထဲရေးနှင့်လူဝင်မှုကြီးကြပ်ရေးဝန်ကြီးဌာန၏ အင်တာနက်စာမျက်နှာ https: //mohai.nugmyanmar.org ရှိ အမှုဖွင့်တိုင်ကြားရန်နေရာတွင် တိုင်ကြားပေးကြပါရန် မေတ္တာရပ်ခံအပ်သည်။
ပြည်သူများ၏ ပေးပို့တိုင်ကြားမှုများနှင့် အမျိုးသားညီညွတ်ရေးအစိုးရလက်အောက်တွင် အမှု ထမ်းလျက်ရှိသော ရဲတပ်ဖွဲ့ဝင်များ၏ စုံစမ်းစစ် ဆေးဖော်ထုတ်မှုများကို အခြေခံ၍ အဆိုပါကိစ္စရပ်များအား တရားမျှတမှုရရှိရေး ဆောင်ရွက်သွားမည်ဟုလည်း NUG ကဆိုသည်။
နိုင်ငံတော်၏အာဏာကို တရားမဝင်လုယူထားသော အကြမ်းဖက်အဖွဲ့အစည်းတစ်ခုဖြစ်သည့် စစ်အုပ်စု၏ ဆောင်ရွက်နေမှုများအားလုံးသည် တရားဥပဒေနှင့်ညီညွတ်မှုမရှိသည့်အတွက် မည်သည့်သက်ရောက်မှုမျှမရှိဘဲ ပျက်ပြယ်ပြီး ဖြစ်သည်ဟုလည်း ထုတ်ပြန်ချက်၌ ပါရှိသည်။
