ပြည်သူ့ကာကွယ်​ရေးအဖွဲ့များကို ကူညီသူများအား ကိုဓဥပ​ဒေအတိုင်းကျင့်သုံးမည်ဟု ပခုက္ကူတွင် စစ်​ကောင်စီနှင့်ပျူများကခြိမ်း​ခြောက်

မကွေးတိုင်း၊ ပခုက္ကူမြို့တွင် အကြမ်းဖက်စစ်ကောင်စီနှင့်ပျူ​စောထီးများက ပြည်သူ့ကာကွယ်ရေးအဖွဲ့များ အားပေးသူများအား ဟာမူရာဘီ၏ ကိုဓဥပဒေအတိုင်းကျင့်သုံး၍ ပြင်းထန်စွာတိုက်ခိုက်သွားမည်ဟု ခြိမ်းခြောက်စာများဖြန့်ဝေနေကြောင်း ဒေသခံများက ပြောသည်။

အကြမ်းဖက်စစ်ကောင်စီက ယနေ့(ဖေဖော်ဝါရီလ ၂၇ ရက်နေ့)တွင် ပခုက္ကူမြို့ပေါ်၌ စာရွက်များကြဲခဲ့ကြသည်။ ထိုစာရွက်များတွင် ပြည်သူ့ကာကွယ်ရေးအဖွဲ့များအား အကြမ်းဖက်ဟုသုံးနှူန်းထားသည်။ထိုအပြင် ပခုက္ကူမြို့ ရှိ စစ်​ကောင်စီတပ်နှင့် ဆက်စပ်သူများ​သေဆုံး ဒဏ်ရာရသည်ကို အပြစ်မဲ့ပြည်သူသေဆုံးထိခိုက်ဒဏ်ရာရမှုများ ဟုသုံးနှုန်းကာ၎င်းတို့​သေဆုံးဒဏ်ရာရသည်ကို ပြည်သူများကဝမ်းသာအားရရှိနေသည်ဟုစွပ်စွဲထားသည်။

ပြည်သူများအား ပိုက်ဆံရှိလျှင် ဥပဒေကိုလှည့်ဖျား၍ရသည်ဟု တွေးတောသူများဟုဆိုကာ စွပ်စွဲထားပြီး ၎င်းတို့ကလည်း မျက်လုံးတစ်လုံးအတွက် မျက်လုံးတစ်လုံး၊ အသက်တစ်ချောင်းအတွက် အသက်တစ်ချောင်းဆိုသော ဟာမူရာဘီ၏ကိုဓဥပဒေအတိုင်း ကျင့်သုံးမည်ဟု တစ်နိုင်ငံလုံးရှိ အမျိုးသားရေးအဖွဲ့များက ဆုံးဖြတ်ချက်ချထားသည်ဟု ခြိမ်းခြောက်ထားသည်။

ပြည်သူ့ကာကွယ်ရေးအဖွဲ့များကို အားပေးထောက်ပံ့မှုမရပ်တန့်ပါက ဆိုင်ရာမိသားစု၏ အသက်အိုးအိမ်စည်းစိမ်များကို ပြင်းထန်စွာတိုက်ခိုက်သွားမည်ဟု လည်းဆိုသည်။

Public Service Announcement

အဆိုပါထုတ်ပြန်ချက်တွင် ပခုက္ကူမြို့ပေါ်ရှိ လုပ်ငန်းရှင် ၁၄ ဦး၏ အမည်နှင့်နေရပ်လိပ်စာများကိုပါ ထည့်သွင်းရေးသားထားပြီး ၎င်းတို့အပါအဝင်ပြည်သူများအား ခြိမ်းခြောက်လိုက်ခြင်းဖြစ်သည်။

“ဒီကနေ့မနက်ပိုင်းက ပခုက္ကူ-မြိုင်လမ်းပေါ်နဲ့ တ​ခြားနေရာတွေမှာ ပျူစောထီးတွေကဖြန့်ကြဲသွားတာ။”ဟု ဒေသခံတစ်ဦးက ပြောသည်။

ဖေဖော်ဝါရီလ ၂၅ ရက်နေ့နံနက်ပိုင်းက ပခုက္ကူမြို့ရှိစည်ပင်ရုံးအား ဒေသတွင်းပြည်သူ့ကာကွယ်ရေးအဖွဲ့များက ပစ်ခတ်ဖောက်ခွဲတိုက်ခိုက်ခဲ့သည်။ထိုအပြင် ယခုတစ်ပါတ်အတွင်း
ကားများကို ဆက်​ကြေး​ကောက်နေ​သော အကြမ်းဖက်စစ်​ကောင်စီတပ်သားများကို ပြည်သူ့ကာကွယ်​ရေးတပ်ဖွဲ့များကတိုက်ခိုက်၍ စစ်ဗိုလ်တစ်ဦးနှင့်တပ်သားတစ်ဦး​သေဆုံးပြီးအချို့ဒဏ်ရာရခဲ့သည်။ အ​လောင်းလာ​သယ်​သော စစ်​ကောင်စီတပ်ကားကိုပါ ပြည်သူ့ကာကွယ်​ရေးအဖွဲ့ကမိုင်းဆွဲတိုက်ခိုက်၍ စစ်​ကောင်စီတပ် ထပ်မံ​သေဆုံးဒဏ်ရာရရှိခဲ့သည်။