မန္တလေးတိုင်း၊ စဥ့်ကိုင်မြို့နယ်တွင် အာဏာသိမ်းစစ်ကောင်စီပိုင် My Tel တာဝါတိုင်အတွင်းရှိ စက်သုံးလုံးအား ကျောက်ဆည်ခရိုင်ကာကွယ်ရေးတပ်ဖွဲ့(K.D.D.F)မှ မိုင်းခွဲတိုက်ခိုက်ရှင်းလင်းခဲ့သည်။
ယနေ့ (မတ်လ ၂ရက်) နံနက်၆နာရီခန့်က စဥ့်ကိုင်မြို့နယ်၊ မြောက်ကျောက်မိုင်းကျေးရွာ အနောက်ဘက်ရှိ အကြမ်းဖက်စစ်ကောင်စီ၏ ဝင်ငွေရလမ်းကြောင်းဖြစ်သော Mytel တာဝါတိုင် အတွင်းရှိ စက်သုံးလုံးအား မိုင်းအကြီး(၃)လုံး အသုံးပြုပြီး ဖယ်ရှားရှင်းလင်းခဲ့ကြောင်း ကျောက်ဆည်ခရိုင်ကာကွယ်ရေးတပ်ဖွဲ့(K.D.D.F)မှ သတင်းထုတ်ပြန်သည်။
“ဒီတိုင်က My Tel တာဝါတိုင် ဖျက်ဆီးမှု ၆ တိုင်မြောက်ပါ။ ပြည်သူတွေအနေနဲ့ အကြမ်းဖက်စစ်ကောင်စီရဲ့ ထုတ်ကုန်တွေ မသုံးစွဲကြဖို့နဲ့ စကစနဲ့ပတ်သက်နေတဲ့ နေရာတွေအနီး မသွားကြဖို့ မေတ္တာရပ်ခံချင်ပါတယ်ခင်ဗျ။”ဟုကျောက်ဆည်ခရိုင်ကာကွယ်ရေးတပ်ဖွဲ့(K.D.D.F)မှတာဝန်ရှိသူကလူထုနွေဦးသို့ပြောသည်။
Public Service Announcement
ဖေဖော်ဝါရီလ ၂၈ရက်နေ့ နေ့လယ်ပိုင်းကလည်း ရန်ကုန်၊မန္တလေး(အမြန်လမ်း)အတိုင်း မန္တလေးဘက်သို့ဦးတည်သွားနေသည့် အကြမ်းဖက်စစ်ကောင်စီ၏ ထောက်ပို့ယာဥ်တစ်စီးအား အမြန်လမ်းမိုင်တိုင်၃၃၃၊ ၁ဖာလုံအရောက်တွင် ကျောက်ဆည်ခရိုင်ကာကွယ်ရေးတပ်ဖွဲ့(K.D.D.F)က မိုင်းဆွဲတိုက်ခိုက်ခဲ့သေးသည်။
