အကြမ်းဖက်စစ်ကောင်စီတပ်များနှင့်လက်ပါးစေ ပျူစောထီးများသည် ဂန့်ဂေါမြို့နယ်အတွင်းရှိ ကျေးရွာအချို့ကို ဝင်ရောက်မီးရှို့ကာ အပြစ်မဲ့ပြည်သူအချို့ကိုလည်း တရားမဲ့သတ်ဖြတ်ခဲ့ကြောင်း ဂန့်ဂေါမြို့နယ်ပြည်သူ့အုပ်ချုပ်ရေးအဖွဲ့က ယနေ့ထုတ်ပြန်သည်။
ဖေဖော်ဝါရီလ ၂၈ရက်နှင့် မတ်လ ၁ရက်တို့တွင် စစ်ကောင်စီတပ်နှင့် ပျူစောထီး လက်ချက်ကြောင့် ရွှေဘိုရွာနှင့်ကံတိုးရွာတွင် လူနေအိမ် ၂၆လုံး၊ သင်တောရွာတွင် လူနေအိမ် ၁၄၇လုံး၊ မြင်သားရွာတွင် လူနေအိမ် ၂လုံး၊ကုန်း(မြင်သားကုန်းရွာ)တွင် လူနေအိမ် ၃၆လုံး စုစုပေါင်းအိမ်ခြေ ၂၁၁ထက်မနည်း မီးလောင်ပြာကျ ပျက်စီးသွားခဲ့သည်ဟု ဖော်ပြထားသည်။
ထို့အပြင် အကြမ်းဖက်စစ်တပ်နှင့်လက်ပါးစေ ပျူစောထီးများလက်ချက်ကြောင့် အပြစ်မဲ့ပြည်သူ ၁၀ဦးထက်မနည်းသေဆုံးခဲ့ရကြောင်း၊ မီးဘေးသင့်အိမ်ခြေနှင့် ကျဆုံးပြည်သူအရေအတွက်မှာ လတ်တလော အတည်ပြုနိုင်သည့် အရေအတွက်သာဖြစ်ပြီးယခုထက်ပိုများနိုင်ကြောင်း ဂန့်ဂေါ(ပအဖ)က ထုတ်ပြန်သည်။
ပြည်သူများ၏ ဆုံးရှုံးရမှုများအတွက် များစွာစိတ်မကောင်းဖြစ်ရကြောင်းနှင့် ပြည်သူများ၏ ထိခိုက်နစ်နာမှုများအတွက် အတတ်နိုင်ဆုံး ကြိုးစားကူညီပေးသွားမည်ဖြစ်ကြောင်း ဖော်ပြထားသည်။
Public Service Announcement
ဂန့်ဂေါမြို့နယ်တွင်းပြည်သူများ၊ ပြည်တွင်းပြည်ပရှိ မြန်မာပြည်သူများ အနေဖြင့်လည်း ဂန့်ဂေါမြို့နယ်အတွင်း ပြည်သူများ၏ ထိခိုက်ဆုံးရှုံးမှုများအတွက်ပူးပေါင်းကူညီပံ့ပိုးပေးကြရန်လည်း ဂန့်ဂေါ(ပအဖ) က မေတ္တာရပ်ခံတိုက်တွန်းထားသည်။
“ကျွန်တော်တို့ ရရှိထားတဲ့အချက်အလက်တွေအရဆို ခန့်မှန်း (စစ်ရှောင်ပြည်သူ)၁၅၀၀၀ လောက်ထိ ရှိပါတယ် တစ်နယ်လုံးမှာပေါ့လေ။ အဓိကက အမိုးအကာ၊ စားနပ်ရိက္ခာ၊ ဆေးဝါးပါခင်ဗျ”ဟု ပအဖ တာဝန်ရှိသူ တစ်ဦးက ပြောသည်။
