ကျောက်ဆည်တွင် စစ်​ကောင်စီအရာရှိယာဥ်တန်းအားလမ်းရှင်း​ပေး​သောရဲနှင့်ယာဥ်ထိန်းရဲများကို KDDFကလက်ပစ်ဗုံးဖြင့်ပစ်ခတ်တိုက်ခိုက်

မန္တလေးတိုင်း၊ ကျောက်ဆည်မြို့တွင် အကြမ်းဖက်စစ်ကောင်စီမှ အဆင့်မြင့်အရာရှိတစ်ဦး​၏ ယာဥ်တန်းကိုလမ်းရှင်းပေးနေသည့် ရဲနှင့်ယာဥ်ထိန်းအုပ်စုအား လက်ပစ်ဗုံးဖြင့် ပစ်ခတ်တိုက်ခိုက်ခဲ့ကြောင်း ကျောက်ဆည်ခရိုင် ပြည်သူ့ကာကွယ်ရေးတပ်ဖွဲ့ KDDF အဖွဲ့က သတင်းထုတ်ပြန်သည်။

ယနေ့ (မတ်လ ၉ ရက်နေ့) နံနက် ၉ နာရီခန့်က အကြမ်းဖက်စစ်ကောင်စီ၏ အဆင့်မြင့်အရာရှိတစ်ဦး၏ယာဥ်တန်းအား လမ်းရှင်းပေးနေသော ရဲတစ်ဦးနှင့် ယာဥ်ထိန်းရဲများအား ကျောက်ဆည်ခရိုင် ပြည်သူ့ကာကွယ်ရေးတပ်ဖွဲ့ KDDF အဖွဲ့မှ လက်ပစ်ဗုံးဖြင့် ပစ်ခတ်တိုက်ခိုက်ခဲ့ခြင်းဖြစ်​ကြောင်း ၎င်းအဖွဲ့ကအသိပေးသည်။

“ကျောက်ဆည်မြို့၊တံစိုးဂိတ်ရပ်ကွက်လမ်းဆုံမှာ ပွိုင့်ကား၁စီး၊ အိမ်စီးကား၆စီးနဲ့သွားတယ်လို့သတင်းရလို့လုပ်ခဲ့တာပါ။လမ်းဆုံ ​နေရာတွေမှာ ရဲနဲ့ယာဥ်ထိန်းရဲတွေစောင့်နေတာတွေ့လို့ လက်ပစ်နဲ့ထုခဲ့တာပါ” ကျောက်ဆည်ခရိုင် ပြည်သူ့ကာကွယ်ရေးတပ်ဖွဲ့ KDDF အဖွဲ့တာဝန်ရှိသူက ပြောသည်။

လက်ပစ်ဗုံးဖြင့်ပစ်ခတ်တိုက်ခိုက်မှု​ကြောင့်အကြမ်းဖက်စစ်ကောင်စီလက်အောက်ခံ ရဲနှင့်ဝန်ထမ်းများ ထိခိုက်မှုအခြေအနေမသိရသေးကြောင်း KDDFအဖွဲ့က ပြောသည်။

Public Service Announcement

မတ်လ ၃ ရက်နေ့ နံနက် ၁၀ နာရီ ၃၅မိနစ်အချိန်ကလည်း အကြမ်းဖက်စစ်ကောင်စီအုပ်စု အခိုင်အမာတပ်စွဲထားသော ကျောက်ဆည်ခရိုင် ထွေအုပ်ရုံးအား ကျောက်ဆည်ခရိုင်ကာကွယ်ရေးတပ်ဖွဲ့(K.D.D.F)မှ လက်ပစ်(၂) လုံးပစ်သွင်း၍ တိုက်ခိုက်ခဲ့သေးသည်။