ကချင်ပြည်နယ် ၊ဟိုပင်မြို့ရှိ လက်ဖက်ရည်ဆိုင်တွင်သံဃာတော်တစ်ပါးနှင့်ကလေးငယ်နှစ်ဦးအပါအဝင်အရပ်သားခုနှစ်ဦးအားသေဆုံးစေခဲ့ပြီးအများအပြားဒဏ်ရာရရှိစေခဲ့သော ပျူစောထီးခေါင်းဆောင်ကို ပြည်သူ့ကာကွယ်ရေးအဖွဲ့က ယနေ့ သုတ်သင်လိုက်သည်။
ဟိုပင်မြို့တွင် ပျူစောထီးခေါင်းဆောင်အဖြစ်နာမည်ကြီးပြီး စစ်တပ်ကျောထောက်နောက်ခံရှိနေ၍ မြို့ခံများက သတိထားရှောင်ကြဉ်နေရသည့် အောင်မျိုးသန့်ဆိုသူကို ယနေ့(မတ် ၁၆ရက်)တွင် သုတ်သင်ရှင်းလင်းလိုက်ခြင်းဖြစ်သည်။
“လဘက်ရည်ဆိုင်ထိုင်နေတဲ့ အပြစ်မဲ့ပြည်သူနဲ့သံဃာတွေကို ပစ်သတ်သွားတဲ့ အကြမ်းဖက်စစ်ခွေးဘောမ ပျူစောထီးခေါင်းဆောင်အောင်မျိုးသန့်ကို ဟိုပင်PDFညီငယ်များမှ တမလွန်သို့ပို့ဆောင်ခဲ့”ဟု ပြည်သူ့ကာကွယ်ရေးအဖွဲ့များ၏ သတင်းထုတ်ပြန်ရေးစာမျက်နှာ Mohnyin Revolution Force က သတင်းထုတ်ပြန်ထားသည်။
အောင်မျိုးသန့်ဦးဆောင်သော ပျုစောထီးအဖွဲ့သည် ၂၀၂၁ နိုဝင်ဘာလ ၇ ရက်က ဟိုပင်မြို့လမ်းဆုံရှိ လူစည်ကားသောလက်ဖက်ရည်ဆိုင်ကို သေနတ်ဖြင့် ဝင်ပစ်ရာအသက် ၇ နှစ်အရွယ်နှင့် အသက် ၁၄ နှစ်အရွယ် မိန်းကလေးငယ်နှစ်ဦး၊ ရဟန်းတစ်ပါးအပါအဝင် နေရာ၌ပင် သေဆုံးခဲ့သူ ၆ ဦးရှိပြီး လက်ဖက်ရည်ဆိုင်အတွင်း ထိုင်နေသူ ၁၃ ဦးနှင့် လက်ဖက်ရည်ဆိုင်၏ မုန့်ဆရာ အမျိုးသားတစ်ဦးစုစုပေါင်း၁၄ ဦးသေနတ် ထိမှန်ဒဏ်ရာရခဲ့သည်။ ကျူးလွန်သူများမှာ မျက်နှာဖုံးစွပ်တပ်မောင်ပြန်သေနတ်များကိုင်ဆောင်ထားသူ ၄၊၅ ဦးဖြစ်ကြောင်းဒေသခံများကပြောသည်။ထိုထဲတွင် အောင်မျိုးသန့်မှာ အဓိကဦးဆောင်သူဟု PDF များကသုံးသပ်ထားသည်။
“အောင်မျိုးသန့်က စစ်တပ်အားကိုးနဲ့ ဗိုလ်ကျနေတဲ့သူ။ အခုတော့ ဇာတ်သိမ်းသွားပြီ။ သေနတ်နဲ့အပစ်ခံရတာ နေရာမှာတင်သေတာပဲ”ဟု ဒေသခံတစ်ဦးကပြောသည်။
Public Service Announcement
“သင်တိုသည်လွန်ခဲသော နိုဝင်ဘာ ၇ ရက်နေ့က ဟိုပင်မြို့ တွင်လက်ဖက်ရည်ဆိုင်ထဲရှိနေသော ဆိုင်ပိုင်ရှင်မိသားစုကလေးသူငယ်များ ရဟန်းသံဃာအပါ ရက်ရက်စက်စက်ပစ်သတ်သွားခြင်းအမှုကို ရက်စက်ယုတ်မာစွာပြုလုပ်ခဲ့ကြသည်။ထိုကြောင့်ယနေ့မှစ၍ ဟိုပင်မြို့မှ ငရဲသို့မှောက်ခုံသွားနိုင်စေရန် ကူညီလိုက်သည်။ သင့်အတွက် ဆီပူအိုး မီးထိုးပြီးသား အသင့်ရှိနေပါပြီ -လူယုတ်မာတွေကိုတရားစီရင်ခွင့်မရရင်အိပ်မပျော်တဲ့ ဗိုလ်တော”ဟု မိုးညှင်းတော်လှန်ရေးပေချ်ကဖော်ပြထားသည်။
ယင်းကဲ့သို့ ရက်စက်ယုတ်မာခဲ့သည့် လုပ်ရပ်အတွက် အောင်မျိုးသန့်အား သုတ်သင်လိုက်ခြင်းဖြစ်ကြောင်းပြည်သူ့ကာကွယ်ရေးအဖွဲ့ဝင်တစ်ဦးက ပြောထားသည်။ ပြည်သူများသတ်ဖြတ်ခံရပြီးနောက် ဟိုပင်PDF က ပြည်သူများအတွက်လက်တုံ့ပြန် မည်ဟုကြေညာထားခဲ့ခြင်းဖြစ်သည်။
