ရန်ကုန်တိုင်း မှော်ဘီမြို့နယ်အတွင်း၌ ဘုရားထီးတင်ပွဲမှပြန်လာသည့် စစ်ဘက်ဆိုင်ရာ အကြီးအကဲ၏ ယာဉ်တန်းကို အဝေးထိန်းဗုံးနှစ်လုံးဖောက်ခွဲတိုက်ခိုက်ခဲ့ကြောင်း အာဏာသိမ်းဆန့်ကျင်ရေးနှင့် ပြည်သူ့လွတ်မြောက်ရေးအဖွဲ့ (ACPLF)က သတင်းထုတ်ပြန် သည်။
မတ်လ ၁၆ ရက် နေ့လယ်၁၁ နာရီခန့်က မှော်ဘီမြို့နယ် မျောက်ချောကုန်းကျေးရွာရှိ ဘုရားထီးတင်ပွဲမှပြန်လာသည့် စစ်ဘက်ဆိုင်ရာ အကြီးအကဲ မိသားစုနှင့် နောက်လိုက်နောက်ပါများ၏ ယာဉ်တန်းကို မြို့ချောင်းလမ်းဆုံ၊ ဆောက်လက်စ တိုးဂိတ်အနီး၌ အဝေးထိန်းဗုံးနှစ်လုံးဖြင့် ဖောက်ခွဲတိုက်ခိုက်ခဲ့ခြင်းဖြစ်ကြောင်း ထုတ်ပြန်ထားသည်။
“ပထမတစ်လုံးသည် ယာဥ်တန်း၏ထိပ်ဆုံးမှမောင်းနှင်လာသော ဒီစီတစ်စီးအားထိမှန်ပြီး ကားရပ်သွားကာ ကားပေါ်မှ စစ်ကောင်စီတပ်ဖွဲ့ဝင်များဆင်းလာပြီးကြည့်ရှုစစ်ဆေးချိန်တွင် နောက်ထပ်တစ်လုံးထပ်မှန်ဖောက်ခွဲ လိုက်ခြင်းကြောင့် စစ်ကောင်စီတပ်ဖွဲ့ဝင်အချို့ ထိခိုက်မှုရှိနိုင်ပြီး လုံခြုံရေးအခြေအနေအရ အတိအကျကို စုံစမ်း၍ မရခဲ့ကြောင်းပြည်သူအား အသိပေးတင်ပြအပ်ပါသည်”ဟု ACPLFက ထုတ်ပြန်ထားသည်။
ယင်းစစ်ဆင်ရေးကို ACPLF အပြင် မှော်ဘီ့ရင်သွေးတပ် ၊ မှော်ဘီ PDF တို့နှင့် ပူးပေါင်းတိုက်ခိုက်ခဲ့ခြင်းဖြစ်သည်။