အကြမ်းဖက်စစ်ကောင်စီ၏ မတရားခြိမ်းခြောက်စွပ်စွဲမှုကို ခံရပါက ခံဝန်ရေးထိုးခြင်း၊ ငွေပေး၍ ညှိနှိုင်းခြင်း စသည့် လုပ်ရပ်များကို လုံးဝ (လုံးဝ) မပြုလုပ်ဘဲ ရှောင်ရှားကြပါရန် အရာတော်မြို့နယ် တော်လှန်ရေးတပ်ပေါင်းစုက မေတ္တာရပ်ခံသည်။
အရာတော်မြို့နယ် တော်လှန်ရေးတပ်ပေါင်းစုအကြမ်းဖက်စစ်ကောင်စီ၏ ခြိမ်းခြောက်မှုကိုခံနေရသော အရာတော်မြို့နယ် ပြည်သူလူထုသို့ မေတ္တာရပ်ခံချက်တစ်ခု ယမန်နေ့ မတ်လ ၁၉ ရက်နေ့တွင် ထုတ်ပြန်ခဲ့သည်။
ရေရှည်ဆင်နွှဲနေသောပြည်သူ့တော်လှန်စစ်ကြောင့်တဖြည်းဖြည်း အင်အားယိုင်နဲ့ လာသည့် အကြမ်းဖက်စစ်ကောင်စီက ဖက်ဆစ်တပ်တို့၏ ထုံးစံအတိုင်း ၎င်းတို့၏ အုပ်ချုပ်ရေးနှင့် တရားစီရင်ရေးယန္တရားကို အကြောက်တရားဖြင့် အသက်သွင်းရန် ကြိုးပမ်းလျက်ရှိကြောင်း၊ အရာတော်မြို့နယ်ရှိ ကျေးရွာများတွင်လည်း ပြည်သူအချင်းချင်း အကြပ်ကိုင်၍ သွေးခွဲဖျက်ဆီးသော အကြောက်တရားဖြန့်ဝေနည်းများ ဖြစ်သည့် နာမည်စာရင်းဖြင့် နေအိမ်ထိ လိုက်လံမွှေနှောက်ခြင်းများ၊ တစ်ရွာလုံးနီးပါးကို အကြမ်းဖက်ဟု ခြိမ်းခြောက် စွပ်စွဲခြင်းများ ပြုလုပ်ကာ ပြည်သူလူထုကို ဒုက္ခပေးလျက်ရှိကြောင်း၊ ထိုသို့ စွပ်စွဲခြိမ်းခြောက်ခြင်းများ ကိုယ်တိုင်ကြုံလာရပါက အရာတော်မြို့နယ် မိဘပြည်သူများအနေဖြင့် စစ်ကောင်စီယန္တရားကို အသိအမှတ်ပြုရာ ရောက်သည့်အပြင် ၎င်းတို့ကို တိုက်ရိုက်အကျိုးစီးပွား ဖြစ်ထွန်းစေမည့် စစ်ကောင်စီလက်အောက်ခံ ဌာန၊ ရုံး၊ ဂါတ်များသို့လူကိုယ်တိုင်သွား၍ ခံဝန်ရေးထိုးခြင်း၊ ငွေပေး၍ ညှိနှိုင်းခြင်းစသည့် လုပ်ရပ်များကို လုံးဝ (လုံးဝ) မပြုလုပ်ဘဲ ရှောင်ရှားကြပါရန် အရာတော်မြို့နယ် တော်လှန်ရေးတပ်ပေါင်းစုက မေတ္တာ
ရပ်ခံထားသည်။
စစ်ကောင်စီနှင့် ညှိနှိုင်းရန် ပွဲစားလုပ်ပေးနေသည့် စစ်တပ်နှင့် ရဲ အဆက်အသွယ်များကိုလည်း သစ္စာဖောက်ဒလံဟု သတ်မှတ်၍ အရေးယူသွားမည် ဖြစ်ပြီး မိမိတို့ သဘောဆန္ဒဖြင့် စစ်ကောင်စီလက်အောက်ခံ ဌာန၊ ရုံး၊ ဂါတ်များ နှင့် သွားရောက်ပတ်သက်ညှိနှိုင်းမိသဖြင့် ဖြစ်ပေါ်လာနိုင်သော နောက်ဆက်တွဲကိစ္စများကို တာဝန်ယူသွားမည် မဟုတ်ကြောင်း အရာတော်မြို့နယ် တော်လှန်ရေးတပ်ပေါင်းစုက အသိပေးကြေညာသည်။
Public Service Announcement
စစ်ကိုင်းတိုင်း၊ အရာတော်မြို့နယ်တွင် အကြမ်းဖက်စစ်ကောင်စီသည် ၎င်းတို့အား ဆန့်ကျင်နေကြသည့် ကျေးရွာအများအပြားအား မကြာခဏဝင်ရောက်ကာ ပြည်သူများအားဖမ်းဆီးခြင်း၊ ပြည်သူ့ပစ္စည်းများအား ဖျက်ဆီးခြင်းများပြုလုပ်ပြီး ခြိမ်းခြောက်လျက်ရှိသည်။
