▪️CRPH ၊ NUG ၊ NUCC နှင့် တိုင်းရင်းသားတော်လှန်ရေးအဖွဲ့အစည်းစသည့် သက်ဆိုင်သူအားလုံးနှင့် တွေ့ဆုံဆွေးနွေးအဖြေရှာရန် မဖြစ်မနေလိုအပ်ဟုဆို
အာဆီယံအထူးကိုယ်စားလှယ်အနေဖြင့် စစ်ကောင်စီ စီစဉ်သည့် တဖက်သတ်တွေ့ဆုံမှုများ၌ အချိန်မကုန်စေဘဲ မြန်မာပြည်သူလူထု၏ အသံကိုနားထောင်ရန် အမျိုးသားညီညွတ်ရေးအစိုးရ(NUG) နိုင်ငံခြားရေးဝန်ကြီးဌာနက တိုက်တွန်းထုတ်ပြန်သည်။
အာဆီယံအထူးကိုယ်စားလှယ်၏ နေပြည်တော်ခရီးစဉ်သည် ယနေ့စတင်ပြီး ယင်းခရီးစဉ်အတွင်း ဖမ်းဆီးထိန်းသိမ်းခံ နိုင်ငံတော်သမ္မတ ဦးဝင်းမြင့်၊ နိုင်ငံတော်အတိုင်ပင်ခံပုဂ္ဂိုလ်ဒေါ်အောင်ဆန်းစုကြည်အပါအဝင် CRPH ၊ NUG ၊ NUCC နှင့် တိုင်းရင်းသားတော်လှန်ရေးအဖွဲ့အစည်း အစရှိ သည့် သက်ဆိုင်သူအားလုံးနှင့် တွေ့ဆုံဆွေးနွေးအဖြေရှာရန် မဖြစ်မနေလိုအပ်ကြောင်း NUG နိုင်ငံခြားရေးဝန်ကြီးဌာနက ဆိုသည်။
NUG နိုင်ငံခြားရေးဝန်ကြီးဌာနသည် အာဆီယံအထူးကိုယ်စားလှယ်၊ ကမ္ဘောဒီးယားနိုင်ငံခြားရေးဝန်ကြီးကို မြန်မာ့အရေးဆွေးနွေးရန် ဖေဖော်ဝါရီလအတွင်းကတည်းက စာရေးသားပေးပို့ခဲ့ ကြောင်း ထုတ်ပြန်ချက်၌ ဖော်ပြသည်။
Public Service Announcement
ထို့အပြင် အထူးကိုယ်စားလှယ်သည် စစ်ကောင်စီ ၏ အကြမ်းဖက် ဖိနှိပ်မှုများ ကိုမျက်ကွယ်ပြုလျက် တရားမဝင် အာဏာသိမ်းမှုကို အသက်ရှည်စေမည့် ချည်းကပ်တွေ့ဆုံမှုများကို ဆောင်ရွက်ခြင်းမပြုရန်လည်း NUG နိုင်ငံခြားရေးဝန်ကြီးဌာနက တောင်းဆိုသည်။
အထူးကိုယ်စားလှယ်၏ခရီးစဉ်အတွင်း အာဆီယံဘုံသဘောတူညီချက် ၅ ရပ်နှင့်စပ်လျဉ်း၍ စစ်အုပ်စု၏ အကြမ်းဖက်လုပ်ရပ်များကို ချက်ချင်းရပ်တန့်စေရေးတွန်းအားပေးရန်၊ လူသားချင်း စာနာမှုအကူအညီများကို NUG ၊ EAO ၊ NGO ၊ CSO များမှတဆင့်ပေးပို့ရန် နှင့် ငြိမ်းချမ်းသည့် ရလဒ်များကို ရှာဖွေရာတွင် ပြည်သူများ၏ အကျိုးစီးပွား၊ လိုလားတောင့်တချက်များကိုသာ အခြေခံရန် NUG က တိုက်တွန်းသည်။
အာဆီယံအနေဖြင့်လည်း မြန်မာပြည်သူတို့၏ တခုတည်းသော တရားဝင်ကိုယ်စားပြု အစိုးရဖြစ်သည့် အမျိုးသားညီညွတ်ရေးအစိုးရနှင့်သာ ပူးပေါင်းဆောင်ရွက်ရန် အတိအလင်း တောင်းဆိုထားသည်။
