အကြမ်းဖက်စစ်ကောင်စီတပ်နှင့် လက်အောက်ခံ အဖွဲ့အစည်းများ မီးရှို့၍ တစ်ပတ်အတွင်း ပြည်သူ လူထုနေအိမ် ၅၀၀ခန့် မီးလောင်ပျက်စီးခဲ့ပြီး အာဏာသိမ်းပြီးနောက်ပိုင်း စစ်ကောင်စီတပ်နှင့် ၎င်း၏ လက်အောက်ခံအဖွဲ့များ မီးရှို့ဖျက်ဆီးခဲ့သည့် အိမ်ခြေ ၇,၇၀၀ ကျော်ရှိခဲ့ဟု Data for Myanmar က ထုတ်ပြန်သည်။
၂၀၂၁ ဖေဖော်ဝါရီ ၁ရက်မှ ၂၀၂၂ မတ်လ ၂၂ ရက်အတွင်း စစ်ကောင်စီတပ်နှင့် လက်အောက်ခံအဖွဲ့အစည်းများ မီးရှို့ရာ နေရာပေါင်း ၂၁၂နေရာမှ လူနေအိမ် ခန့်မှန်းခြေ ၇,၇၂၉လုံး ပျက်စီးခဲ့ကြောင်းဖော်ပြထားသည်။ ပြီးခဲ့သည့် မတ်လ ၁၆ရက်အထိ စာရင်းများအရ စစ်ကောင်စီတပ် မီးရှို့သည့် လူထုနေအိမ် ၇,၂၄၈ လုံးရှိရာ တစ်ပတ်တာကာလအတွင်း နေအိမ် ၄၈၁လုံးကို စစ်ကောင်စီတပ် ထပ်မံမီးရှို့ခဲ့ခြင်းဖြစ်သည်။
အဆိုပါအချက်အလက်များကို သတင်းမီဒီယာများ၌ ဖော်ပြသည့် တိုက်ပွဲသတင်းများ၊ နေအိမ်မီးရှို့ခံရသည့် သတင်းများကို ဖြစ်စဉ်အလိုက် ပြန်လည် စိစစ်ရေတွက်ထားခြင်းဖြစ်သကဲ့သို့ဒေသခံ လူ့အခွင့်အရေးအဖွဲ့များ၊ စစ်ဘေးရှောင် ကူညီရေးအဖွဲ့များမှ ထုတ်ပြန်သည့် စာရင်များကိုလည်း အခြေခံထားကြောင်း၊ မပြည့်စုံသည့် အချက်အလက်များကိုချန်ထားခဲ့၍ မြေပြင်၌မီးရှို့ခံရသည့်အရေအတွက်ပိုများနိုင်ဟု Data for Myanmar ကဆိုသည်။
အကြမ်းဖက် စစ်ကောင်စီတပ် မီးရှို့ဖျက်ဆီးခဲ့သည့် အိမ်ခြေ ၇,၇၀၀ကျော်အနက် အိမ်ခြေ ၄,၈၀၀ ကျော်မှ စစ်ကိုင်းတိုင်းဒေသကြီးအတွင်းရှိ ကျေးရွာများမှ ဖြစ်ပြီး မကွေးတိုင်းမှ အိမ်ခြေ ၁,၁၀၀ ကျော်၊ ချင်းပြည်နယ်မှ အိမ်ခြေ ၁,၁၀၀ ကျော် ပျက်စီးခဲ့ရသည်ဟု စာရင်း၌ ပါရှိသည်။
Public Service Announcement
အကြမ်းဖက်စစ်ကောင်စီတပ်သည် ယခုရက်ပိုင်းအတွင်း စစ်ကိုင်းတိုင်းအတွင်းရှိ မြို့နယ်များသို့ ထိုးစစ်ဆင် တိုက်ခိုက်မှုများ၊ရွာလုံးကျွတ်မီးရှို့မှုများ ပြည်သူလူထုများကို ဖမ်းဆီးသတ်ဖြတ်မှုများ ဆက်လက်ပြုလုပ်နေပြီး အရပ်သားပြည်သူလူထုများကို ပို၍ ပစ်မှတ်ထားတိုက်ခိုက်နေသည်။
