အကြမ်းဖက်စစ်ကောင်စီတပ်က ပြီးခဲ့သည့် နှစ်မတ်လ ၂၇ရက်က မြို့ပေါင်း ၇၃ မြို့၌ အကြမ်းဖက် ပစ်ခတ်ဖြိုခွင်းခဲ့၍ တစ်ရက်တည်း ပြည်သူအနည်းဆုံး ၁၁၄ဦးသေဆုံးပြီး၊ ၂၉၉ ဦး ဒဏ်ရာရခဲ့ကြောင်း Data for Myanmar က ယနေ့ထုတ်ပြန်သည်။
ယခင်နှစ် မတ်လ ၂၇ရက်က မြန်မာနိုင်ငံရှိ မြို့ပေါင်း ၁၇၀ခန့်၌ စစ်တပ် အာဏာသိမ်းမှုကို ဆန့်ကျင်သည့်အနေဖြင့် ပြည်သူများက ငြိမ်းချမ်းစွာ ဆန္ဒထုတ်ဖော်ခဲ့ရာ ယင်းအနက် မြို့ပေါင်း ၇၀ကျော်၌ အကြမ်းဖက် ဖြိုခွင်းပစ်ခတ်မှုများ စစ်ကောင်စီတပ်ဖွဲ့ဝင်များက လုပ်ဆောင်ခဲ့သည်ဟု ဆိုသည်။
ထိုသို့ အကြမ်းဖက်ပစ်ခတ်ဖြိုခွင်းမှုများကြောင့် လူသေဆုံးထိခိုက်မှုများပြား ခဲ့သည့်အပြင် ယင်းနေ့ တစ်ရက်တည်း ပြည်သူ ၂၈၀ ကျော်ကိုလည်း စစ်ကောင်စီတပ်က ဖမ်းဆီးခဲ့သည်ဟု ဖော်ပြထားသည်။
စစ်အာဏာသိမ်းမှု ဆန့်ကျင်ရေး ပြုသူလူထု လှုပ်ရှားမှုကို ပြည်နယ်နှင့် တိုင်းအားလုံး၌ ပြုလုပ်ခဲ့ကြပြီး အကြမ်းဖက်စစ်တပ်၏ ပစ်ခတ်ဖြိုခွင်းမှုများ ကြောင့် မန္တလေးတိုင်းအတွင်း၌ ပြည်သူလူထု ထိခိုက်သေဆုံးမှု အများဆုံးဖြစ်ပြီး တစ်ရက်အတွင်း ၄၈ဦးထက်မနည်း သေဆုံးကာ ၁၂၃ဦးထက်မနည်းဒဏ်ရာရခဲ့သည်။
Public Service Announcement
ရန်ကုန်တိုင်းတွင် ၂၅ဦး ထက်မနည်းသေဆုံးခဲ့ပြီး ၃၅ဦးထက်မနည်း ဒဏ်ရာရခဲ့သည်ဟု ဆိုသည်။
အဆိုပါ အချက်အလက်များကို သတင်းမီဒီယာများ၌ ဖော်ပြခဲ့သည့် သတင်းများကို ရက်အလိုက်၊ ဖြစ်စဉ်အလိုက် စိစစ်ရေတွ့်ထားခြင်းဖြစ်ကြောင်း၊ မပြည့်စုံသည့် အချက် အလက်များ ချန်ထားခဲ့ရ၍ မြေပြင်၌ ပြည်သူလူထု သေဆုံးထခိုက်မှု ယခုထက်ပိုများနိုင် ကြောင်း Data for Myanmar က ထုတ်ပြန်ခဲ့သည်။
နိုင်ငံရေးအကျဉ်းသားများ ကူညီစောင့်ရှောက်ရေးအသင်း(AAPP)က ပြုစုထားသည့် အချက်အလက်များအရ စစ်အာဏာသိမ်းပြီးနောက်ပိုင်း အကြမ်းဖက်စစ်ကောင်စီတပ်၏ အကြမ်းဖက်လုပ်ရပ်များကြောင့် ကျဆုံးခဲ့ရသည့် ပြည်သူ အနည်းဆုံး ၁,၇၀၇ ဦး ရှိပြီး ဖမ်းဆီးခံခဲ့ရသူ ၁၃,၀၀၀ နီးပါးရှိသည်ဟု ဆိုသည်။
စစ်ကောင်စီတပ်သည် ပြည်သူလူထုများကို ဖမ်းဆီး နှိပ်စက်၊ သတ်ဖြတ်မှုများ ဆက်တိုက် ပြုလုပ်ခဲ့သည့်အပြင် ပြည်သူလူထုနေအိမ်များကို မီးရှို့ဖျက်ဆီးခြင်းများ၊ ပြည်သူလူထုပိုင် ပစ္စည်းများ ခိုးယူ၊ လုယူခြင်းများ လည်း ပြုလုပ်ခဲ့သည်။
(ညောင်ဦးမြို့တွင် ၂၀၂၁ မတ်လ၂၇ရက်က စစ်အာဏာရှင်ဆန့်ကျင်ရေး ငြိမ်းချမ်းစွာ ဆန္ဒပြနေသော အသက်(၃၅)အရွယ် ကိုဝေဇင်အား အကြမ်းဖက် စစ်တပ်က ပတ်ခတ်မှုကြောင့် ကျဆုံးမှုကို မတ်လ၂၈ရက်တွင် သဂြိုလ်ရန် မြို့လူထုက လိုက်လံပို့ဆောင်ပေးနေစဥ်)
