ကရင်ပြည်နယ်၊ မြ၀တီမြို့နယ်၊ လေးကေ့ကော်ဒေသကိုဖြတ်သန်း၍ ဖလူးကျေးရွာဘက်မှ ဝေါ်လေသို့ ကျူးကျော်ဝင်ရောက်လာသည့် စစ်ကောင်စီတပ်ကို ကြားဖြတ်တိုက်ခိုက်ခဲ့ကြောင်း ကော်ဘရာစစ်ကြောင်းက သတင်းထုတ်ပြန်သည်။
တပ်မ (၄၄)နှင့် တပ်မ (၂၂)လက်အောက်ခံ အကြမ်းဖက်စစ်ကောင်စီ၏ ပူးပေါင်း စစ်ကြောင်းအား ကော်ဘရာ စစ်ကြောင်းမှ ကြားဖြတ်တိုက်ခိုက်ခဲ့ရာ မြဝတီ-ဝေါ်လေ ဆက်သွယ်ထားသော ကားလမ်း၏ လမ်းပိုင်းတစ်နေရာတွင် နံနက် ၉နာရီမှ ညနေ ၄နာရီအထိ တိုက်ပွဲဖြစ်ခဲ့သည်ဟု ဆိုသည်။
အကြမ်းဖက် စစ်ကောင်စီဘက်မှ အထိအခိုက်အကျ အဆုံးများသဖြင့် ရဟတ်ယာဉ် ၂စီးဖြင့် နှစ်ကြိမ်ပစ်ကူပေးတိုက်ခိုက်ခဲ့ကြောင်း သို့ရာတွင် ကာကွယ်ရေးတပ်ဖွဲ့မှ ထိခိုက်ကျဆုံးမှု မရှိကြောင်း ဖော်ပြထားသည်။
အဆိုပါ တိုက်ခိုက်မှုများကြောင့် အကြမ်းဖက်စစ်ကောင်စီဖက်မှ အနည်းဆုံး ၂၀အထက်ကျဆုံးနိုင်ပြီး ၊ရာဂဏန်းခန့် ထိခိုက်ဒဏ်ရာရရှိခဲ့ကြောင်း ဖော်ပြထား သည်။ အချို့အလောင်းများသည် စစ်ရေးသတင်းထုတ်ပြန်ခဲ့သည့် မတ်လ ၂၇ရက် ညပိုင်းအထိ လမ်းမ၌ ပြန့်ကျဲနေကြောင်း ထုတ်ပြန်ထားသည်။