စစ်ကိုင်းတိုင်း ခင်ဦးမြို့နယ်တွင် အကြမ်းဖက်စစ်ကောင်စီကို ခုခံတိုက်ခိုက် နေသည့် Khin U Local Guerrilla Force တပ်ဖွဲ့မှ (၂၁)နှစ်အရွယ် လူငယ်ရဲဘော်တစ်ဦး မတော်တဆထိခိုက်မှုဖြင့် ကျဆုံးခဲ့ရသည်။
ရဲဘော်တိုင်ပြောက်သည် မတ်လ၄ရက်က မတော်တဆထိခိုက်မှုဖြင့် ကြွေလွင့် ခဲ့ရကြောင်း၊ ရဲဘော်တိုင်ပြောက်၏ ရဲစွမ်းသတ္တိနှင့် လုပ်ဆောင်ချက်များကို KUGF တပ်ဖွဲ့မှ လေးစားဂုဏ်ယူ အလေးနီပြုကြောင်း ထုတ်ပြန်သည်။
“ရဲဘော်အသက်က ၂၁နှစ်ပါဗျ။ ကျွန်တော်တို့ KUGF တပ်ဖွဲ့မှာ အားအကိုးရဆုံး ရဲဘော် တစ်ယောက်ပါဗျ။ ကျွန်တော်တို့ အပါအဝင် ရဲဘော်အားလုံးက ရဲဘော်တိုင်ပြောက် ကိုချစ်ကြတယ် လေးစားကြတယ်။ သူ့တွက် ကျွန်တော်တို့တွေ ဘယ်တော့မှလည်း မမေ့ပါဘူး။ ရဲဘော်တိုင်ပြောက်ရဲ့ စကားတစ်ခွန်းက အမြဲတမ်းအမှတ်ရစေတယ်ဗျ။ သူပြောနေကျ စကားလေးတစ်ခွန်းက မိုင်းသံတို့ သေနတ်အသံကြားမှ အိပ်ပျော်မှာတဲ့။ ခုတော့ သူကြားချင်တဲ့ အသံတွေကြားပြီး ထာဝရအိပ်စက်သွားတယ်ဗျာ။ တကယ်ပါ။ သူရဲ့လုပ်ဆောင်ချက်တွေက ကျွန်တော်တို့ တပ်ဖွဲ့အတွက် အရာရာ အောင်မြင်စေပါတယ်။ ပြီးတော့ ဘယ်အရာမဆို သူအောင်မြေအောင် လုပ်ဆောင်တယ်။ ရဲဘော်တစ်ယောက်ဆုံးရှုံးရခြင်းဟာ တန်ဖိုးမဖြတ် နိုင်တဲ့ဆုံးရှုံးမှုပါဗျာ”ဟု KUGF တပ်ဖွဲ့မှ တာဝန်ရှိသူက ပြောသည်။
ခင်ဦးမြို့နယ်တွင် ယနေ့အချိန်အထိ အင်တာနက်ဖြတ်တောက်ထားခြင်းခံရပြီး အကြမ်းဖက်စစ်ကောင်စီတပ်သည် ကျေးရွာများသို့ဝင်ရောက်ဖျက်ဆီးကာ ဖမ်းဆီးမှုများပြုလုပ်နေ၍ ပြည်သူများ ထွက်ပြေးတိမ်းရှောင်နေရကြောင်း ဒေသခံများက ပြောသည်။