အကြမ်းဖက်စစ်တပ်က နေအိမ်များကိုပါ မီးရှို့ဖျက်ဆီးနေဟုဆို
စစ်ကိုင်းတိုင်း ခင်ဦးမြို့နယ်တွင် ပျူစောထီးများပါဝင်သော အကြမ်းဖက် စစ်ကောင်စီတပ်နှင့် ဒေသတွင်းပြည်သူ့ကာကွယ်ရေးတပ်ဖွဲ့များ တိုက်ပွဲဖြစ်ပွားနေပြီး နှစ်ဖက်ကျဆုံးမှုများရှိကာ အကြမ်းဖက်စစ်တပ်က နေအိမ်များကိုပါ မီးရှို့ဖျက်ဆီးခဲ့ကြောင်း ခင်ဦးသတင်းမှန်ပြန်ကြား ရေးက သတင်းထုတ်ပြန်သည်။
မတ်လ ၂၉ရက်က ခင်ဦးမြို့နယ် ရွာစဥ်ကျေးရွာသို့ ဝင်ရောက်အကြမ်းဖက် ခဲ့သည့် စစ်ကောင်စီတပ်သည် ယမန်နေ့(မတ်လ ၃၀ ရက်)နံနက်ပိုင်းက ကုလားလူးရွာနှင့် ရှားလွင်ကျေးရွာများသို့ လက်နက်ကြီး၊ လက်နက်ငယ်များဖြင့် ပစ်ခတ်ဝင်ရောက်ခဲ့ပြီး ကျေးရွာများအနီးတွင် နယ်မြေခံ (ပကဖ)အဖွဲ့များနှင့် အပြန်အလှန်ပစ်ခတ်မှုများရှိခဲ့ကာ နှစ်ဖက်အကျအဆုံးများရှိကြောင်း၊ အဆိုပါပစ်ခတ်မှုတွင် ရဲဘော်(ပကဖ)သုံးဦး ကြွေလွင့်ခဲ့ရကြောင်း စိတ်မချမ်းမြေ့ဖွယ် ကြားသိရသည့်အပြင် ကုလားလူးရွာနှင့် ရှားလွင်ကျေးရွာမှ နေအိမ်အချို့ကိုလည်း မီးရှို့ဖျက်ဆီးသွားခဲ့ကြောင်း ဖော်ပြထားသည်။
ထို့အပြင် အကြမ်းဖက်စစ်တပ်သည် ညပိုင်းတွင် ကုလားလူးကျေးရွာသို့ ဝင်ရောက်ခဲ့သဖြင့် ဒေသခံများ ထွက်ပြေးတိမ်းရှောင်ခဲ့ရကြောင်း ခင်ဦးမြို့နယ် သတင်းမှန်ပြန်ကြားရေးက အသိပေးသည်။
Public Service Announcement
ခင်ဦးမြို့နယ်အနောက်ခြမ်းတွင်လည်း ညနေပိုင်းတွင် အကြမ်းဖက်စစ်ကောင်စီ ၏ အခြေကုပ်စခန်းတစ်ခုဖြစ်သော ပျဥ်ထောင်ကျေးရွာရှိ ပျူစောထီးနှင့် အကြမ်းဖက်စစ်တပ်ကို (ပကဖ)ပူးပေါင်းအဖွဲ့များက ဒရုန်းဖြင့် တိုက်ခိုက်ခဲ့ရာ တစ်ဦးသေဆုံးပြီး လေးဦး ပြင်းထန်စွာ ဒဏ်ရာရရှိသွားကြောင်း ထပ်မံ ထုတ်ပြန်သည်။
အဆိုပါဖြစ်စဥ်များမှန်ကန်ကြောင်းကို ခင်ဦးနယ်အခြေစိုက် Khin U Local Guerrilla Force အဖွဲ့က အတည်ပြုသည်။
မတ်လ ၁၅ရက်ကလည်း အကြမ်းဖက်စစ်ကောင်စီတပ်သည် Khi U Local Guerrilla Force တပ်ဖွဲ့တပ်ရင်းအားဝင်စီးပြီး လက်နက်ခဲယမ်းများ ဖျက်ဆီးကာ အချို့သောပစ္စည်းများ သယ်ဆောင်သွားပြီးစုစုပေါင်းတန်ဖိုး ကျပ်သိန်း ၃၀၀ဖိုးခန့်ဆုံးရှုံးခဲ့ကြောင်း၊ ထိုအပြင် အပြစ်မဲ့ ပြည်သူ နှစ်ဦးအားသတ်ဖြတ်သွားကြောင်း Khi U Local Guerrilla Forceက ထုတ်ပြန်ထားသည်။
